“Mi ta keda para pa integridad di ARA (Contraloria General). Mi ta kere cu tur persona cu ta traha na un Hoge College mester tin na tur momento un conducta cu no ta trece e nomber di e organisacion den mal luz publico,” esaki ta loke cu e parlamentario Shailiny Tromp Lee (MEP) a contesta momento cu a puntr’e riba e actitud recien di minister Ursell Arends.
Por corda con na aña 2021 e parlamentario aki a manda un carta puntrando gobierno ki paso ta tuma contra Frederick Nuboer, kende a haci su mes culpabel di buracheria publico y escandalo na momento cu e tabata vice-presidente di Contraloria General.
Awo con ta compara e dos situacionnan aki cu otro, ta loke e representante di 24ora.com a puntra e parlamentario durante un conferencia di prensa. “E mes a indica den su declaracion cu esaki tabata un descuido y cu el a siña di e les aki. Un cos mi por bisa bo Marko, mi ta keda para pa e echo cu ora bo ta bebe bo no ta stuur y si bo ta stuur no bebe. Esaki no tabata un caso di buracheria, KPA no tabata envolvi. Ta facil pa compara appel cu peer.”
El a bay bek un rato den pasado, riba e caso di Nuboer pa bisa cu ya caba tabatin hopi indicacion di e problema cu e persona aki tabatin cu alcohol. E acto di buracheria tabatin ripiticion, y ya caba na 2016 e tabata envolvi caba den algo similar. E tempo ey fraccion di MEP a manda un carta cuestionando su presencia den Conseho di Contraloria General debi na su actitud, pero Gobierno di AVP no a haci nada. “Pues e ta cuestion cu tabatin un persona den e College cu repetitivamente tabata hay’e envolvi den acto di buracheria. Y a pone instancia den mal nomber y mal luz.”
E tempo ey niun hende mester a actua pasobra e persona mes a tuma su retiro. Den caso di Ursell “el a siña di su les.”
