Sospechoso principal den caso Flamingo, y politico di plataforma PAIS, Otmar Oduber a presenta su di tres carta na presidente di Hof diaranson mainta. Esaki ta un otro peticion dirigi na presidente di Hof pa loke ta trata e caso cu ta practicamente cinco aña bao investigacion, for di september 2019.
Autoridadnan a drenta cas di Oduber y haci entrada hudicial na 2020, dus ta yegando cuater aña cu e investigacion aki ta tumando luga desde cu a cuminsa oficialmente cu ne. Awor a entrega un di tres carta cu e intento di haya contesta pa ki dia e caso lo por inicia.
Na e momento aki ta luchando pa yega corte, bringa Oduber su inocencia den corte. “Pero e abuso cu ta tumando luga, y p’esey nos ta para awe akinan – no tin palabra pa expresa e forma con nan ta kibra y bay cu bo derechonan humano, mi no sa si ta pasobra mi ta ex-politico of asina e sistema ta,” segun Oduber. Practicamente lo bay ta wardando cinco luna pa por cuminsa scucha testigonan.
Abogado, mr. Vito Carlo ta bisa cu porfin a haya oido na un instancia hudicial cu ta mustra cu tin algo no ta cuadra, cu tin mester di investigacion, pero cos ta pega pasobra testigonan no por bin dilanti. Esaki ta pasobra mester tin un hues comisario specifico p’e caso.
Pa Oduber, ta un inhusticia pasobra ta trat’e otro forma pa motibo cu e ta ex politico ora e caso penal a cuminsa. Na momento e investigacion a cuminsa segun abogado Carlo, Oduber tabata simplemente un ciudadano y comerciante. “Pero nan a persigui’e y caba cu ne personalmente, su negoshinan, como un politico. Esey ta algo cu tin Otmar aworaki frustra, rabia, cansa, emocionalmente y fisicamente,” segun Carlo.
Por lesa mas den TREMPAN.
