Diamars mainta, e asociacion di empleadonan di WEB Aruba N.V., esta VWI a acudi hunto cu nan abogado na sede di ministerio publico pa haci uzo di nan derecho di realisa un peticion formal pa e entidad hudicial inicia un investigacion den e maneho di Utilities Aruba N.V. Segun VWI e decisionnan di e Utilities no ta cumpli cu statuut, ni regla di corporate governance cu ta den vigencia.
Secretario di VWI, Michael Lin a splica cu e decision di tuma e paso aki no ta di un dia pa otro. Pa hopi tempo caba e organisacion a bin ta vocifera nan malcontento pa e maneho cu ta hiba na WEB Aruba N.V., specialmente pasonan tuma relaciona cu un Expression Of Interest (EOI) pa proyecto cu lo produci mas energia di biento. E paso di VWI ta bin tambe despues di a consulta cu diferente stakeholder den e sector, entre otro sindicato y experto legal.
Lin: “VWI ta lamenta tambe cu, riba nivel halto di maneho di companianan estatal, e tipo di movecionnan aki ta tuma luga, mientras cu nos sa cu nan no ta cuadra cu e statuut di e companianan, esta WEB Aruba N.V. y Utilities Aruba N.V. E ta contra ley y mas ainda, e ta contra e codigo di corporate governance di e companianan.”
E representante di VWI na sede di ministerio publico na Camacuri, a tuma e oportunidad pa reitera tambe cu nan ningun momento ta contra di ningun iniciativa cu ta promove energia renovabel of alternativo of duradero. Lin a indica cu e opcion aki ta forma parti pa hopi aña di un roadmap aproba pa nan directiva, pa Hunta di Comisario, e propio Utilities Aruba N.V. y hasta gobierno di diferente signatura den transcurso di tempo.
Por ultimo, e secretario di VWI ta haci un yamado na gobierno pa tira bista den loke ta pasando na Utilities Aruba N.V. Fuera di esey, e organisacion ta contento cu gobierno ta trahando riba e ley di Corporate Governance y e Codigo di Corporate Governance.
