A tuma nota con e siman aki DOW a pone diferente ekipo di trabou entre Parlamento te cu Royal Plaza, esta ekipo pa desvia trafico. Tur e preparacion aki ta pa drecha e caminda malo cual miles di auto ta pasa bay bin tur dia. Fin di Januari e famia real lo ta na Aruba. Esey kisas entre otro ta un di e motibonan cu ta core drecha e caminda.
Pasando den auto kisas no ta mira e situacion di e caminda. Moviendo na pia si ta mira e diferencia con e trucknan y movecion di trafico tur dia tin e caminda basta kibra n’e rand. P’esey mes diahuebs anochi a cuminsa cu e trabou pa raspa e caminda.
Hunto cu polis, a cera cierto caminda pa desvia e trafico. Te cu marduga DOW su personal a traha cu e demas departamento pa ranca e prome parti di asfalt bieu y asina prepara pa tira e capa nobo di asfalt.
E siguiente fase di ranca asfalt lo sigui diabierna anochi pa diasabra marduga. Ora tur cos ta ranca, e trabou pa basha capa nobo ta cuminsa.
Na Aruba ta hopi caminda mas pio cu esaki y cu tambe ta urgente pa drecha. Lapimento so lo no yuda cada biaha. Na final e caminda entre parlamento te cu Royal Plaza lo keda cu su capa nobo di asfalt.
