Toque De Queda Hulanda: Legal!

E splicacion huridico pa e Toque De Queda anochi tabata na ordo. Esaki Corte na Den Haag a dicidi diabierna mainta, den un caso cuminsa door di Viruswaarheid. E grupo di accion a haya rason siman pasa diamars cerca Corte pa cual Estado a dicidi di bay den apelacion.

E caso aki den apelacion Estado a gana. Hof a dicidi cu e splicacion huridico pa e TDQ tabata na ordo.

Tabata siman pasa ainda Corte di prome instancia a bisa cu e TDQ no tabata legal, pasobra den su introduccion a haci uzo di un ley special pa casonan di emergencia. Hues provisional a haya cu e crisis di corona no tabata e caso pa cual a traha e ley di emergencia, manera por ehempel ora cu un dijk kibra.

Hof a bisa awo cu e TDQ anochi ta introduci basa riba e ley. E crisis di corona ta trece cu ne “circunstancianan special”.

“Gobierno a confia riba conseho di Outbreak Management Team,” Hof a menciona. “Pero tambe Corte ta di opinion cu e introduccion di e TDQ tabata proporcional y cu no tabatin otro herment na su disposicion.”

Viruswaarheid den casacion

Segun Willem Engel di Viruswaarheid Hof a comete un eror: “A bay di acuerdo cu tur cos di Estado, y esey ta un violacion grandi di derechonan humano. Hues a pone esey un banda.”

Engel ta bisa cu Viruswaarheid ta bay Casacion contra e decision aki di Hof. Hoge Raad lo trata e caso,  cu ta ta e corte mas halto di Hulanda. “E influencia grandi di politica den estado di derecho ta hopi cla,” Engel a bisa.