Kisas tin hende cu ainda no ta consciente cu e cambio cu a wordo introduci na januari 2017 ariba tereno di impuesto di vehiculo di motor. E ta un cambio pa pone personanan cu ta haci uzo di nos careteranan cu nan vehiculo cumpli debidamente cu nan pagonan di impuesto.
Den combersacion cu Luenne Gomez-Pieters, directora di Departamento di Impuesto, el a splica cu desde prome di januari, 2017 Inspector di Belasting tin e autoridad pa pone un cobransa adicional cu un boet si e cliente no cumpli cu pago di belasting di vehiculo di motor. Pa loke ta trata e aña 2018 e termino pa paga e ultimo mita di aña a vence dia 2 di juli ultino. Sinembargo, mirando cu e grupo cu no a paga ainda tabata hopi grandi, hunto cu Minister di Finansas a extende e deadline pa dia 31 di juli.
Dia 2 di juli ultimo Departamento di Impuesto y oficinanan auxiliar na MFA-nan a wordo invadi pa hendenan cu a presenta pa paga nan number di auto 2018. El a recorda cu clientenan por haci nan pagonan online tambe, y tin basta hende ta haci esaki. E ta miho, pasobra si tur hende laga pa ultimo ora y bay na e oficinanan, e empleadonan ta haya nan cu extra trabou y e cliente mes lo mester warda basta prome cu e wordo atendi.
Pa loke ta numbernan A un total di 12.956 cliente, di e mas o menos 73 mil plachinan cu tin, cu no tin nada paga di e belasting aki. Di trucknan di diesel, di e 1.181 vehiculonan solamente 184 no tin nada paga. Tin 2.244 plachi di motorfiets (MFA) y di esaki 464 no tin nada paga. D e T-plachi tin 40 cu no a paga di en total 289; di 451 taxi 34 no a paga nada y di autonan di huur (V-wagen) tin 4.582 tin 695 cu no a cumpli cu nada den 2018.
Analisando e cifranan ariba menciona, e departamento ta yega na e conclusion cu tin un mehoracion den e pagonan pero loke si a keda constata cu atrobe e clientenan ta warda te na ultimo ora pa haci nan pagonan di impuesto. Si paga na tempo, sra. Pieters ta bisa, no tin frustracion di banda di e cliente y e departamento tampoco ta hay’e cu problema cu e mester manda mas hende dilanti pa atende cu e pagonan di ultimo ora. Ora cu cera luna di juli ta bay mira kende no a paga y ta cuminsa procesa e cobransanan cu e boet manera ta stipula den ley.