Dia Internacional pa Conservacion di Sistema Ecologico di Mangel (mangroven) ta cay tur aña riba 26 di juli. E dia a wordo proponi door di Ecuador y a wordo aproba den e conferencia general di UNESCO na aña 2015.
Mangelnan, ubica den regionnan tropical unda tera y lama ta encontra otro, ta forma un ecosistema unico na mundo. E ecosistema aki tin beneficionan considerabel pa humanidad, medio ambiente y biodiversidad.
Mangelnan ta brinda proteccion pa tempestadnan di tempo, tsunami y aumento di nivel di lama. Nan ta evita erosion di zona costera, regula calidad di awa na costa, mantene areanan di pesca y ta brinda un habitat pa especienan martitimo den extincion.
Mangelnan tambe ta funciona como un mecanismo natural pa almacena carbono atmosferico (blue carbon sinks) y asina ta yuda mitiga e efectonan di disrupcion climatico rond di zonanan costero.
Aunke mangelnan ta hopi util, toch nan ta encontrando hopi problema door di e ser humano. Ta wordo estima cu globalmente e cobertura di mangelnan rond mundo a mengua cu casi mitar. Esaki primordialmente door di desaroyo rond di zonanan costero.
UNESCO su programanan di “Man and Biosphere (MAB)” y GeoParks cu ta inclui mondinan di mangel rond di mundo ta un bon empuhe pa yuda conserva e ecosistema importante aki.
Un bon ehempel ta e area di mondi di mangel grandi “Sundarbans” ubica entre India y Bangladesh .
Via programanan di UNESCO ta busca di desaroya conocemento riba e ecosistema di mangelnan y ta yuda maneha y conserva nan miho.
Programanan di UNESCO, manera “Man and Biosphere” y GeoParks ta yuda tambe den desaroyo sostenibel di un pais pober, ta yuda den e desaroyo di comunidadnan indigena y ta promove e papel di e ser femenino, kende ta den e curason di economia local.
E comision Oceanografico Intergubermental (UNESCO/IOC) ta un stakeholder importante den e “BlueCarbon Initiative”. E meta di e “Blue Carbon Initiative” ta pa combati e efectonan di cambio climatico via conservacion, proteccion, restoracion y uzo sostenibel di zonanan costero y ecosistemanan maritimo. E enfoke di e proposito ta principalmente ariba mangelan, moerasnan di marea y yerba di lama.
Dia Internacional di conservacion di sistema Ecologico di Mangel ta un bon oportunidad pa corda tur persona riba e importancia di e sistema ecologico aki y e necesidad pa conserve. E compromiso di Ecuador, cu ta e pais cu a bin cu e idea pa tin un Dia Internacional di Conservacion di Sistema Ecologico di Mangel y unda por bisa cu Ecuador ta haciendo un trabou excelente den Galapagos, mester ta un inpiracion pa otro paisnan. E area di Galapagos ta cay den e programanan di “Man and Biosphere” Y “World Heritage” di UNESCO.
