Den e caso cu a tuma luga dia 30 di november aña pasa, Eddy Rincon Bravo di 19 aña di edad no a sobrevivi e tiro cu el a haya for di Shannon Williams. Tin dos testigo cu a scucha for di dje kico a pasa: un bisiña cu tabata den e area y polis.
Dia 30 di november aña pasa un señora tabata den su veranda di cas na Savaneta ora cu un poco despues di 7:00 pm el a tende un tiro.
E testigo a bay den garashi y a mira un auto para cu luznan cendi. Claramente el a mira un persona tira na suela, banda di e otro. Un homber tabata para banda di dje y a bisa “Mi ta bay mata bo” y a tende esaki mas cu un biaha. El a core pasa man pa telefon y bati alarma na 911 y a bolbe pafo. E momento ey e auto a disparce caba.
Segun e testigo a sigui declara, el a tende un bos di homber cu ta grita pidi ayudo. Na momento cu el a bay pafo cu e flashlight den man, a mira e homber drumi abou. E victima na suela a bis’e: “nan a horta 3 mil florin. Williams a tira mi y kier a laga mi na tanki”.
E prome polis cu a yega na e sitio tambe por a scucha algun palabra di Eddy prome cu el a perde conocemento. Nan a yega haya un homber cu pia den gips na suela, gritando di dolor, na su bariga, banda drechi (heup). El a bisa cu e mester a bula di auto pa scapa su vida. “Shannon kier a hiba mi tanki pa mata mi”, e momento ey el a cuminsa perde conocemento.
Segun rapport di patholoog, e bala a drenta na banda drechi schuin ariba, pasa den un aorta y a bay pega den su ribchi.
Mientras cu ambulance a transporta e herido cu urgencia pa hospital, e polisnan a mobilisa y a yega rapidamente na detencion di e nomber cu e victima a duna nan. Pero Shannon a dicidi ya caba cu e lo no papia cu e polisnan. Den corte el a bin duna un version cu no ta pa horta placa of otro cos, pero pa 50 florin di e cocaina cu el a caba di cumpra p’e. Esaki mientras cu prome cu a busca Eddy e anochi ey, el a pasa su cas busca un tas den cual tabatin un arma, segun su amigo y chauffeur di e auto den cual nan tabata (Ka Min Li di 17 aña).
Tanto Li como su amiga, kende tabata sinta dilanti, tambe a tende e menasanan “entrega e placa den bon of den malo” y ya caba despues cu a los e tiro “si bo a duna mi e placa, e cos aki lo no a pasa”. E palabranan tabata hopi friu expresa.
Ministerio Publico tabatin varios acusacion contra Shannon Williams (esun cu a los e tiro fatal); Ka Min Li (chauffeur di e auto den cual a comete e crimen) y Jian Wea Li (Primo di Ka Min kende a sconde un arma p’e). E ultimo aki no tabata envolvi den e crimen mes. Tambe a pidi pa ehecuta e castigonan condicional cu tabata colga riba nan cabes di e otro delitonan den pasado pa cual a haya condena. E otro acusacion tabata posesion di arma di candela; acusacionnan subsidiario si no haya esun mas pisa di matamento proba. Pa Shannon tin afpersing, cu acto violento cu tabatin morto como consecuencia.
Den caso di Williams fiscal a haya tur delito proba y a pidi 19 aña; den caso di e dos primonan no tin prueba convincente y legal cu nan tabata sa kico Wlliams su intencion tabata pa cu Eddy Rincon. A pidi pa declara nan liber di tur e acusacionnan relaciona cu e matamento. Si a pidi pa declara proba posesion di arma di candela. Esey tabata pa un Baretta y 50 bala propiedad di Ka Min y cu el a pidi su primo busc’e y scond’e un otro caminda. Pa Jian Li a pidi 24 luna di cual 6 luna ta condicional. Den su caso tabatin sentencia mesora y a dun’e 12 luna y mester sinta e 6 luna condicional cu e tin di un otro caso. Pa Ka Min, menor di edad pero cu no ta prome biaha ta hay’e envolvi cu husticia pa arma of algo violento, a pidi Jeugddetentie di 18 luna di cual 6 luna ta condicional, 2 aña di prueba, ehecuta castigo anterior y pone bou guia.
Aki tres siman tin sentencia den e caso aki.
