Clinica di Dialyse di Hospital (HOH) ta bek, cu su anochi informativo, unda cu den un solo sala lo t’ey presente nefrologo, enfermero specialisa, dietista y trahado social pa contesta tur pregunta.
E anochi di informacion aki lo tuma luga na MFA Noord diahuebs, dia 15 di juni fo’i 6:30 pa 9:00 pm. Tambe lo por tin e oportunidad pa check sucu, colesterol, presion y tambe e peso completamente gratis.
Raysa Carolina, kende ta forma parti di e team di Dialyse, tabata den Noticiero Enfoke y a conta cu pueblo di Aruba ta cordialmente invita pa bin n’e sesion informativo aki. Ta haci e evento aki cuater biaha pa aña, unda cu ta purba di trece informacion na comunidad, kico t’e problematica y e malesanan di riñon y yuda asina e poblacion p’asina por detecta e problemanan hopi mas problema.
PROBLEMA TA ALARMANTE
Pa Aruba, como un isla chikito, e problematica ta basta grandi mirando e cantidad di e habitantenan. E poblacion di dialyse ta creciendo cada biaha mas. P’esey tambe kier yega n’e personanan eyfo p’asina duna tambe tip kico por haci pa por detecta e problemanan di riñon mas trempan.
SINTOMA MAS COMUN
Na momento cu e riñonnan cuminsa faya, no ta sinti nada na comienso. Ta te ora e problema ta hopi avansa ta bay cuminsa sinti sintoma manera cansancio, pia ta hincha of ta sinti cu falta di rosea, pasobra no ta orina hopi mas.
Mayoria biaha ora cu esaki sosode ta hopi laat caba. Esey tambe ta duna informacion na pueblo riba esaki, con pa preveni malesa di riñon y con pa detecta e malesa hopi mas prome.
E EVENTO
E evento, manera ya indica lo tuma luga na MFA Noord di 6:30 pa 9:00 pm, unda cu manera e portanan habri, lo bay check peso, sucu, colesterol y tambe presion completamente gratis pa tur hende cu bin atende e charla. Nefrologo lo t’ey, trahado social, dietista y tambe un booth di producto di Abbot (pa pashent di dialyse manera bebida cu hopi proteina, etc. cu e comunidad por mira con pa nutri nan curpa) lo t’ey presente.
