Un tata y un yiu Mericano a bin causa problema den e parkinglot maneha pa Crystal Casino. E tata y su yiu tabata cliente na Crystal pero recien a haya blacklist pa mal comportacion.
Seguridad a gara e yiu ta lora marihuana den baño algun dia pasa. Di eynan a saca ambos y nan no mag di drenta e casino mas. Ademas nan no mag drenta den parkinglot di e Casino. Dia cu nan a bay, a menaza e miembro di seguridad cu tabata trahando na entrada di parkinglot. Hasta a bisa cu nan lo bolbe. Dia cu a atende cu nan tambe na e parkinglot, nan a menaza y tabata kier pa kita e security cu tabata trahando. A core cu nan cu auto cu tur. Diaranzon atardi nan a bolbe y yega drenta parkinglot sin puntra.
Ora e seguridad a bay atende cu nan, e tata a baha dal e seguridad un mokete den cara. El seguridad a pidi refuerzo pero a reacciona bek tambe pasobra aki tata y yiu a cuminsa cu nan agresion. Tabata dos contra uno. Yudanza a yega pa e miembro di seguridad. E supervisor di seguridad cu a yega a purba calma cos. Asina mes e tata Mericano tabata altera. Na dado momento e kier a dal e supervisor tambe. Cos a bay asina leu cu durante su intento pa dal e supervisor, a dale tene y bay tera cune. Eynan el a resisti y hasta morde e supervisor. E Mericano a haya basta rasca na rudia y elleboog. Esey tabata pasobra e tabata resisti riba e asfalt. E yiu mes cu a mira cu sla por coy su curpa tambe a sali core bay laga e tata. Hendenan cu a mira a bati alarma. Varios unidad di Polis a yega na e sitio. A atende cu tur esnan envolvi. No tabata tin detencion.
Polis a manda e tata y yiu Mericano pa bay entrega keho si nan ta desea of bay tambe dokter busca declaracion. Tambe Polis a mustranan cu eybanda nan no mag di yega mas pasobra nan no ta bon bini. Parce nan ta biba na Aruba. Ademas di bin agredi e miembro di seguridad, el a ofende tur esnan local haciendo nan trabou na e sitio. Ofensanan contra Arubianonan. E golpinan cu nan a bay cune ta recuerdonan di e menazanan cu nan a expresa algun dia pasa y bolbe tambe pa cumpli cu e menazanan. Awor nan a haya nan mes mal sirbi.
