Camara di Comercio di Sint Maarten (COCI) a lansa un iniciativa cu ta reuni cinco isla Caribeño, cu e meta di fortalece conexionnan comercial y habri porta pa empresarionan local tin acceso na mercado internacional.
Durante e prome dia di e programa na Miami, Tamara Leonard, presidente di COCI, a expresa su satisfaccion cu e realisacion di e proyecto. El a duna Dios e gloria pa e logro y a reconoce e sosten di su directiva durante e proceso di preparacion.
“Na prome luga, mi tin cu duna Dios e gloria. Si no tabata pa Dios, nos no lo por a transforma e vision aki den realidad. Tambe mi tin cu gradici mi directiva pa nan sosten durante henter e aña”, Leonard a declara.
E presidente a aclara cu e iniciativa no ta limita na Sint Maarten ni na un sector specifico, sino cu ta busca crea oportunidadnan pa empresarionan di tur cinco isla amplia nan negoshinan y conecta cu mercado mas grandi.
“Nos no por keda solamente soñando cu algun dia nos productonan lo ta riba e rekinan di e mercadonan grandi na Merca y mas leu. Nos mester crea e oportunidad pa logra esey y transforma e vision aki den realidad pa nos comunidadnan”, el a declara.






Cooperacion entre camaranan di comercio
Leonard a destaca e importancia di cooperacion entre camaranan di comercio, a pesar di diferencia den nan structura y funcionamento. Den algun isla, afiliacion na camara di comercio ta obligatorio, mientras cu na otro esaki ta boluntario. Segun dje, e diferente modelonan por complementa otro y brinda empresarionan mas exposicion, conexion comercial y oportunidad di crecemento.
E ta considera cu camaranan di comercio no mester limita nan papel na registro di compania, sino cu nan mester contribui activamente na sostenibilidad y desaroyo di e negoshinan cu nan ta representa.
Sosten di organisacionnan internacional
Segun Leonard, e iniciativa a ricibi un respuesta positivo di diferente compania y organisacion, tanto na Miami como den e cinco islanan. E sosten a inclui conexionnan comercial, informacion y orientacion pa facilita relacionnan entre empresarionan Caribeño y e mercado Americano.
E ta destaca cu e Caribe tin productonan y un identidad propio cu por resulta atractivo pa consumidor y empresarionan internacional. Pa logra e potencial aki, sinembargo, ta importante uni hende y organisacionnan cu un vision comparti y un interes den beneficio colectivo.
Miembresia na Greater Miami Chamber of Commerce
Un di e beneficio principal di e programa ta e oportunidad pa participante bira miembro di Greater Miami Chamber of Commerce, cu e miembresia inclui den e tarifa di participacion. Asina, empresarionan no solamente por presenta nan negoshinan, sino tambe integra un red comercial cu por amplia nan conexionnan y alcance internacional.
Leonard a indica cu pa edicionnan futuro por considera otro organisacion comercial cu por ofrece oportunidadnan adicional pa conecta empresarionan Caribeño cu mercado internacional. “Cualke iniciativa cu por trece nos empresarionan den rednan di contacto cu ta permiti nan expande mas leu di nos costa, esey ta nos mision”, e presidente a declara.




Acceso virtual pa empresarionan cu no por a biaha
Leonard a reconoce cu interupcionnan den servicio di aerolinea a evita cu algun participante por biaha pa Miami. Pa evita cu nan perde e oportunidad, COCI a coordina transmision live di e programa y lo organisa reunionnan via Zoom cu oradornan y presentadonan di e diferente tayer.
E organisacion ta considera tambe ofrece consultanan individual via internet, pa e empresarionan por haya informacion mas specifico tocante e productonan y oportunidadnan presenta. Leonard a aclara cu e ausencia di algun participante tabata resultado di circunstancianan fuera di nan control, y no di falta di interes. Pa e motibo aki, COCI ta busca manera pa tur participante por beneficia di e iniciativa, incluyendo un posibel descuento pa e proximo aña.
Cu e proyecto aki, COCI ta busca fortalece e cooperacion entre cinco isla, amplia e red comercial di empresarionan Caribeño y crea mas oportunidad pa nan conkista mercado internacional y genera prosperidad pa generacionnan presente y futuro.







