Parlamentario di MEP, Dangui Oduber, a cuestiona e falta di accion di Minister di Salud, drs. Mervin Wyatt-Ras, dilanti di e crisis financiero cu Hospital di Aruba ta enfrenta.
Segun Oduber, e minister tabata na altura di e problema desde februari, pero a pesar di diferente señal di alarma di directiva di hospital y sindicato ABV, ainda no tin un solucion concreto.
E crisis ta afecta e operacion di hospital, caminda un di e seis salanan di operacion a cera y servicio di endoscopia a wordo suspende. Tambe tin preocupacion pa suministro di medicamento y pago na proveedor.
Oduber a cuestiona tambe e investigacion financiero (quick scan) cu a wordo solicita pa examina e gastonan di hospital, mientras cu e minister aparentemente ta considera un segundo investigacion.
Un otro punto importante ta e surplus di aproximadamente AWG 350 miyon cu AZV tin, mientras Hospital di Aruba ta lucha pa mantene su servicio. Esaki ta lanta pregunta tocante e posibilidad di utiliza recurso financiero pa yuda hospital supera su crisis.
Pa diahuebs ta programa un reunion cu Raad van Bestuur di hospital y representantenan di sindicato pa trata e situacion.
E preocupacion principal ta cu, mientras cu reunion y investigacion ta continua, e servicio medico ta keda bou di presion. Aseguradonan di AZV y comunidad ta spera claridad, responsabilidad y, sobre tur, un solucion concreto pa garantisa continuidad di cuido medico na Aruba.
Pa mas, lesa TREMPAN.