Camara di Comercio y Industria di Aruba (KvK) ta participando den e mision comercial From Island Roots to Global Routes na Miami, Merca, cu e proposito di crea oportunidadnan di negoshi, inversion y colaboracion internacional pa empresarionan Rubiano. Diederik Kemmerling, presidente di Camara di Comercio, a splica cu e institucion ta representa aproximadamente 21 mil compania riba nos isla. Fuera di registra empresa, Camara di Comercio ta organisa misionnan comercial anualmente. Den añanan anterior, delegacionnan a bishita Surnam, Colombia y Panama.
E mision actual ta reuni alrededor di 100 participante, incluyendo representantenan di Camaranan di Comercio di Aruba, Corsou, Boneiro y e parti Hulandes y Frances di Sint Maarten. Segun Kemmerling, e participacion colectivo ta facilita contacto cu organisacionnan importante manera Camara di Comercio di Miami, The Beacon y representantenan di gobierno local.
El a destaca cu Miami ta ofrece hopi oportunidad cu e empresarionan Rubiano posiblemente ta subestima. Durante su prome dia di reunionnan, el a constata interes di e companianan na Miami pa inverti na Aruba y explora solucionnan pa diferente desafio local. Impact Hub Aruba ta un di e organisacionnan participante cu ta buscando colaboracion cu companianan tecnologico internacional.
E programa ta inclui exposicion comercial, workshop y reunionnan cu SelectFlorida, The Beacon y consul Hulandes na Miami. Kemmerling ta spera cu e contactonan establece durante e mision lo contribui na colaboracionnan concreto, expansion empresarial y fortalecemento di relacionnan economico entre Aruba y Merca.
Pa mas detaye lesa TREMPAN.








