Durante su discurso na e prome Kingdom Summit na Sint Maarten, Prome Minister Mike Eman a presenta e progreso economico y social cu Aruba a experimenta durante e ultimo decadanan. Sin embargo, el a destaca tambe un di e retonan mas grandi cu pais ta enfrenta: logra cu e prosperidad economico ta beneficia tur ciudadano y ta contribui na un miho calidad di bida pa pueblo di Aruba.
Durante su presentacion di e State of the Nation, Eman a comparti cu e delegacionnan di Aruba, Corsou, Sint Maarten y Hulanda un bista amplio riba e desaroyo di Aruba, su sistema di proteccion social, e importancia di Status Aparte y e oportunidadnan pa fortalece cooperacion entre e cuatro paisnan di Reino Hulandes. Un di e mensahenan central di Prome Minister Eman tabata cu, a pesar di e crecemento significativo di turismo y economia di Aruba, ainda tin un grupo grandi di empleadonan cu nan ingreso ta keda bou di e bestaansminimum, e nivel minimo di ingreso necesario pa cubri e gastonan basico di bida.
Status Aparte di Aruba y e importancia di autonomia den Reino
Prome Minister Eman a dedica e prome parti di su discurso na e lasonan historico entre e islanan Caribense y Hulanda. Segun Eman, durante e ultimo generacionnan, e islanan a desaroya un conexion profundo cu otro, no solamente pa medio di nan historia constitucional, pero tambe door di laso familiar, cultural y social.
Como ehempel, Eman a menciona su bishita reciente na Sint Eustatius, unda el a topa cu hopi habitante cu tin un conexion directo cu Aruba. E experiencianan aki ta demostra cu e relacionnan entre nos islanan ta bay mas leu cu e structuranan gubernamental. Durante su reflexion riba e historia constitucional di Reino, Eman a destaca specialmente e fecha di 1 di januari 1986, ora cu Aruba a obtene su Status Aparte.
Segun Prome Minister, e decision historico aki a brinda Aruba e oportunidad pa establece su propio prioridadnan politico, social, economico y cultural, mientras cu pais a mantene su relacion constitucional cu Hulanda y e otro partinan di Reino. Eman a destaca cu e generacionnan anterior cu a lucha pa e posicion constitucional di Aruba a logra un balansa entre e deseo di autodeterminacion y e importancia di mantene e siguridadnan cu e relacion den Reino ta ofrece.
E balansa aki ta permiti cu Aruba por determina su propio direccion di desaroyo, basa riba e necesidadnan di su poblacion, mientras cu pais ta forma parti di un Reino cu tin responsabilidadnan comparti.
Defensa- relacion exterior y nacionalidad como garantia importante
Un otro tema cu Eman a destaca ta e importancia di e responsabilidadnan cu e paisnan ta comparti bou di Statuut di Reino. Entre esakinan ta defensa, relacionnan exterior y e nacionalidad Hulandes cu e ciudadanonan di Reino ta comparti. Eman a haci referencia na e tensionnan geopolitico cu e region Caribense a experimenta durante e ultimo tempo.

Segun dje, e responsabilidad di Reino den e areanan di defensa y relacionnan exterior ta brinda un garantia importante pa e islanan, particularmente den e periodonan di incertidumbre internacional. Prome Minister a destaca tambe e importancia di nacionalidad Hulandes, cu ta brinda oportunidad na nos hobennan di Aruba pa studia y desaroya nan mes na Hulanda y otro pais di Europa. Segun Eman, e bentahanan aki ta forma parti di e balornan cu e paisnan mester aprecia y preserva, mientras cu nan ta continua fortalece e relacionnan den Reino.
Aruba a desaroya un sistema amplio di proteccion social
Durante e presentacion di e situacion di Aruba, Prome Minister Eman a expresa su satisfaccion cu e sistema di proteccion social cu pais a logra desaroya durante e ultimo decadanan. El a destaca cu Aruba tin un sistema di seguro general di malesa, AZV, introduci na aña 2000, cu ta brinda acceso na un pakete amplio di cuido medico pa e poblacion.
Tambe el a dedica atencion na e sistema di pension, cu ta consisti di dos pilar importante. E prome ta Algemene Ouderdomsverzekering (AOV), cu ta brinda un pension basico na nos grandinan. E segundo pilar ta e sistema di pension complementario pa e empleadonan, cu Aruba a introduci na 2011. Segun e cifranan cu Eman a presenta, actualmente alrededor di 38.000 empleado na Aruba ta acumula derecho na un pension complementario, ademas di nan AOV.
Eman a splica cu e segundo pilar aki ta importante pa futuro di nos grandinan, considerando cu AOV solamente no semper ta suficiente pa garantisa un ingreso cu ta permiti un persona biba dignamente despues di su retiro. Prome Minister a destaca tambe e ampliacion di diferente facilidadnan di asistencia social pa e personanan mas vulnerabel den nos comunidad.
Den e contexto aki, el a menciona e legislacion cu ta programa pa wordo trata den Parlamento di Aruba dia 3 di december, relaciona cu sosten financiero pa famianan cu muchanan cu necesidad especial di cuido. Segun Eman, e esfuersonan aki ta forma parti di e trabou pa continua fortalece e sistema di proteccion social di Aruba, cu e obhetivo di brinda mas siguridad y sosten na e personanan y famianan cu mas mester di ayudo.
Turismo y economia di Aruba a registra crecemento significativo
Un otro parti importante di e discurso tabata dedica na e desaroyo economico di Aruba, particularmente den e sector turistico. Eman a presenta un comparacion entre e situacion economico di Aruba na 2010 y e desaroyonan registra den e añanan posterior.
El a destaca cu na 2010 Aruba tabata ricibi alrededor di 800.000 turista y cu desde e periodo ey e sector turistico a registra un crecemento considerabel. Tambe el a haci referencia na e aumento di e ingreso promedio genera door di e sector hotelero, como un indicacion di e balor economico cu turismo ta genera pa Aruba.
Segun Eman, e crecemento di turismo y economia ta representa un logro importante. Sin embargo, esaki no ta significa automaticamente cu tur ciudadano ta sinti e beneficio di e progreso. Prome Minister a enfatisa cu e cifranan positivo di economia mester wordo evalua hunto cu e realidad social di nos poblacion.
Diesocho mil empleado cu ingreso bou di bestaansminimum
Uno di e puntonan mas importante di e discurso tabata e preocupacion di Prome Minister Eman tocante e diferencia entre crecemento economico y bienestar di e poblacion. Segun e cifranan cu el a presenta, alrededor di 18.000 empleado na Aruba ta percibi un salario bou di e bestaansminimum.
Eman a indica cu esaki ta representa aproximadamente 41 porciento di e empleadonan di pais. E cifranan aki, segun Prome Minister, ta demonstra cu e crecemento di economia y turismo no ta traduci automaticamente den un miho calidad di bida pa tur hende. Eman a destaca cu, mientras cu economia ta registra crecemento y e sector turistico ta genera mas ingreso, ainda tin un grupo significativo di empleadonan cu ta enfrenta dificultad pa cubri nan necesidadnan basico.
Durante su discurso, el a resumi e reto aki cu e siguiente palabranan: “De vertaalslag van welvaart naar welzijn, naar het werkelijke welzijn, dat dat nog een uitdaging is.” Cu e declaracion aki, Eman ta pone enfasis riba e necesidad pa transforma prosperidad economico den bienestar real pa e poblacion. E preocupacion aki ta relaciona directamente cu e discusion actual na Aruba tocante e necesidad di aumenta salario minimo y acerca e ingreso di empleadonan na e bestaansminimum.
E presentacion di Eman ta pone e tema aki den un contexto mas amplio, caminda e pregunta principal ta con un pais cu ta registra crecemento economico por garantisa cu mas ciudadano ta beneficia di e progreso.

Retonan comparti di nos islanan chikito
Prome Minister Eman a destaca cu Aruba no ta para su so den e retonan aki. E islanan Caribense den Reino tin diferente caracteristica economico y social cu ta crea vulnerabilidadnan comparti. Entre esakinan ta e dependencia di turismo, e tamaño limita di nan economianan y e costo halto pa mantene e servicionan publico y infrastructura adecua.
Segun Eman, e paisnan chikito mester cubri su gastonan importante pa enseñansa, cuido medico, infrastructura, servicionan publico y funcionamiento di gobierno, mientras cu nan capacidad economico y financiero ta limita door di nan tamaño. E realidad aki ta crea e necesidad pa busca solucion nobo y identifica oportunidad pa cooperacion entre e paisnan. Eman a destaca cu e Kingdom Summit ta un oportunidad pa e cuatro paisnan dialoga tocante e retonan aki y investiga con nan por yuda otro.
Cooperacion den Reino mester crea mas balor pa tur pais
Durante e ultimo parti di su discurso, Prome Minister Eman a pone enfasis riba e necesidad pa fortalece e relacionnan den Reino, no solamente pa preserva e structura constitucional existente, pero tambe pa crea oportunidadnan nobo di desaroyo. Segun Eman, e paisnan por explora con nan capacidadnan, experiencia y posicion geografico por complementa otro pa crea mas balor economico y social.
Prome Minister a menciona e posibilidad pa fortalece cooperacion bilateral y multilateral entre e paisnan Caribense y Hulanda, incluyendo participacion di e institucionnan Hulandes den iniciativanan cu por contribui na desaroyo economico di nos islanan. E idea principal ta pa e relacion den Reino no keda limita na responsabilidadnan constitucional, pero pa e paisnan busca activamente con nan por beneficia mutuamente di cooperacion.
Eman a enfatisa cu e paisnan mester identifica oportunidadnan cu por fortalece nan economianan, mehora e calidad di servicionan publico y contribui na un futuro mas stabil pa nan poblacionnan. Na final di su presentacion, Prome Minister Eman a expresa e disposicion di Aruba pa participa den e dialogo cu un actitud habri. “We zijn hier ook met een open hart en een open mind gekomen om daarover te spreken”, Eman a declara.
Kingdom Summit como plataforma pa un futuro comparti
E Kingdom Summit ta reuni e gobiernonan di Aruba, Corsou, Sint Maarten y Hulanda durante 17 y 18 di november, cu e obhetivo di fortalece cooperacion y establece un dialogo mas continuo entre e cuatro paisnan. E encuentro ta tuma luga na Sint Maarten, cu Prome Minister Dr. Luc Mercelina como anfitrion. Gobierno di Hulanda ta representa door di Secretario di Estado pa Relacionnan den Reino, Eric van der Burg.
Durante e prome dia, cada pais ta presenta su propio State of the Nation, brindando un bista riba su logronan, retonan y oportunidadnan pa cooperacion. E segundo dia ta dedica na continuacion di e dialogo entre e delegacionnan y preparacion di un declaracion final.
Cu su presentacion, Prome Minister Mike Eman a pone enfasis riba dos aspecto fundamental pa futuro di Aruba: preserva e bentahanan di su autonomia den Reino y logra cu e progreso economico ta traduci den bienestar real pa su poblacion. Pa Aruba, e participacion na e Kingdom Summit ta brinda un oportunidad pa comparti su experiencia, identifica solucionnan comun y contribui na un relacion den Reino cu ta dirigi riba mas cooperacion, beneficio mutuo y un miho futuro pa nos tur.