Home » Clifford Heyliger (AVP): Tin cu tene cuenta rib’e aspecto di individualismo di salario minimo

Clifford Heyliger (AVP): Tin cu tene cuenta rib’e aspecto di individualismo di salario minimo

by Lis

Parlamentario di AVP, Clifford Heyliger, a cuestiona e uzo frecuente di e palabra “responsabel” den e discusion riba salario minimo na Aruba. Segun Heyliger, no ta suficiente pa lider politico y representante di comercio apela na responsabilidad sin presenta solucion concreto pa e situacion financiero cu hopi trahado ta enfrenta.

Heyliger ta considera cu e pregunta principal no mester ta solamente si un aumento di salario minimo ta un decision responsabel, sino si ta responsabel pa acepta cu un persona cu ta traha un dia completo no por cubri su necesidadnan basico cu su entrada.

“Nan ta uza un palabra magico, e palabra “responsabel.” Tur esnan cu kier keda bon cu comunidad, pero no kier duna comunidad locual nan merece, ta uza e palabra aki. Pero nos mester puntra nos mes: kico nan kiermen cu e palabra ‘responsabel’? Pasobra e palabra aki a bira un manera pa papia di responsabilidad sin bin cu solucion”, Heyliger a declara.

E parlamentario a cuestiona si ta responsabel pa acepta cu un persona cu ta gana salario minimo mester traha dos of tres trabou, of busca un trabou adicional, pa por cubri su gastonan basico.

Segun Heyliger, despues di paga pa cuminda, huur y transporte, hopi biaha no ta resta suficiente placa pa atende otro necesidadnan di bida, incluyendo esnan di e yiunan. E ta indica cu un persona por ta un trahado excelente y traha duro, pero toch su salario por lag’e den un situacion financiero hopi dificil, unda ta bira casi imposibel pa cubri tur su gastonan.

Diferencia entre un individuo y un famia

Heyliger tambe a referi n’e argumento cu representantenan di comercio, entre otro Kamer van Koophandel, a presenta den e discusion riba bestaansminimum. Segun e argumento aki, ora ta papia di bestaansminimum, mester tene cuenta cu un famia, pasobra un pareha por comparti e gastonan y no tin e mesun gastonan cu dos persona cu ta biba separadamente.

Como ehempel, nan ta menciona un pareha unda un persona ta gana entre 5.000 y 6.000 florin, mientras e otro ta gana salario minimo. Hunto, nan entrada por supera e nivel di bestaansminimum.

Heyliger ta reconoce cu e calculo aki por ta corecto den cierto situacion, pero e ta cuestiona si ta hustifica pa basa e discusion di salario minimo riba e entrada combina di un pareha.

E parlamentario a señala e contradiccion cu e ta mira den e manera con sociedad ta trata e derecho individual. Segun Heyliger, den hopi otro aspecto di bida, sociedad ta pone enfasis riba libertad individual y e derecho di cada persona pa tuma su propio decision. Pero ora ta trata di salario minimo, e mesun principio no ta haya e mesun atencion.

Mama soltera y dependencia financiero

El a pone enfasis riba e situacion di parehanan cu ta separa y e cantidad di mama soltera na Aruba. E ta puntra kico ta pasa cu un señora cu tabata conta cu e entrada di su pareha pa cubri e gastonan di cas, pero despues di un separacion mester atende tur gasto su so.

“Un pareha por tin un meneer cu ta gana mas placa cu e señora. Pero si e pareha kibra, con ta para cu e señora? Nos tin hopi mama soltera. Nan mester depende di un otro persona pa por sobrevivi?”, Heyliger a puntra.

Segun e parlamentario, e argumento di e entrada combina di un pareha no ta tene suficiente cuenta cu e realidad di e personanan cu mester mantene nan mes y nan yiunan cu un solo entrada.

Discusion mester ta riba un salario digno

Pa Heyliger, e situacion aki ta mustra con importante ta trata e salario minimo desde e perspectiva di e individuo y su capacidad pa biba dignamente.

E ta considera cu, en bes di limita e discusion na loke ta conveniente pa comercio, mester tin un debate mas profundo riba e nivel di entrada cu un persona mester pa cubri su necesidadnan basico.

“Esey ta locual nos mester discuti. En bes di haci e individuo mas liber, nos kier mara e bek, pasobra no ta cumbini comercio pa nos bay den un discusion pa aumenta e salario minimo te na un nivel digno pa por biba”, Heyliger a declara.

Pa e parlamentario di AVP, e pregunta central no ta solamente si un aumento di salario minimo ta responsabel pa economia, sino tambe kico ta un salario digno y si un persona cu ta traha duro tin e derecho di gana suficiente pa biba cu dignidad.

Bo por gusta tambe

Adblock Detected

Please support us by disabling your AdBlocker extension from your browsers for our website.