Home » Marvin Kelly di Tour Operators Uni: Delineacion di caminda y un “Nature Task Force” ta e yabi pa proteha naturalesa sin stroba turismo

Marvin Kelly di Tour Operators Uni: Delineacion di caminda y un “Nature Task Force” ta e yabi pa proteha naturalesa sin stroba turismo

by Lis

Den un continuacion di su ponencia tocante e sector di tour operador y e dialogonan intensivo cu Gobierno y instancianan concerni, Marvin Kelly representante di Tour Operators Uni, ta duna mas detaye riba e retonan, e proposicionnan concreto cu a keda presenta y  evita problema den futuro.

Segun Kelly, e proceso a encera un total di 13 reunion constructivo no solamente cu departamentonan clave, pero tambe 3 reunion  cu Aruba Birdlife Conservation. Maske e prome instante tabata carga un caracter mas bien di debate, e situacion a cambia radicalmente na momento cu ABC Tours a comparti nan frustracion y preocupacionnan, presenta un proposicion detaya di con ta mitiga impacto y aclaria e rol cu cada partido tin cu hunga conhuntamente.

E solucion ta simpel: Delinea caminda y pone infrastructura basico
Un di e puntonan mas fuerte cu Kelly ta trece dilanti ta e falta di conocemento practico riba tereno di logistica ora di evalua e operacionnan di tour. Maske e instancianan tin un conocemento profundo di naturalesa y flora/fauna algo cu Kelly ta respeta profundamente, pero e operadornan di tour mester haya e espacio pa splica con e industria ta funciona den practica. E contra proposicion presenta pa e sector a alinea bon cu e pensamento di e instancianan despues di un bon intercambio di idea.

Pa loke ta trata e solucion definitivo pa proteha e areanan di naturalesa sin afecta e experencia di e bishitante y pueblo local, e proposicion ta sumamente cla y simpel:
Delineacion di caminda:
Ora gobierno delinea e caminda (por ehempel un ruta di cinco pa seis meter hancho, bon señala), e ta preveni destruccion sin sentido.
Instalacion di borchi y “sleeping-police” (speed bumps / barera natural):
Esaki ta yuda guia trafico y mantene vehiculonan riba e ruta stipula.

Comparti e ruta cu pueblo:
Duna bek pueblo su caminda pa nan tambe por disfruta di naturalesa, pero evita di cera areanan completamente, ya cu esaki ta corta e atraccionnan disponibel na Aruba y ta causa un impacto negativo.

E urgencia di un “Nature Task Force”
Pa garantisa cu e esfuersonan aki no keda solamente riba papel, Kelly a haci un apelacion fuerte na Gobierno pa instala un “Nature Task Force”. E meta di e organo aki ta bon cla, si no forma un grupo di trabao activo y conhunto aworaki, e sector lo ta enfrentando e mesun problemanan  otro aña atrobe.
Cu e proposicionnan aki, Tour Operators Uni ta demostra cu un balansa sano entre conservacion di medio ambiente y desaroyo turistico ta perfectamente posibel, pero e ta exigi dialogo continuo, comprension mutuo y accion concreto di parti di autoridadnan.

Bo por gusta tambe

Adblock Detected

Please support us by disabling your AdBlocker extension from your browsers for our website.