Despues di un periodo di basta tension den e sector di tour operador, un serie di combersacion constructivo cu diferente departamento gubernamental a trece claridad, comprension y un base solido pa traha hunto riba solucionnan duradero. Asina Marvin Kelly representante di Tour Operators Uni , a duna di conoce den un declaracion caminda el a elabora riba e importancia di e encuentronan reciente.
Segun Kelly, apesar cu na cuminsamento tabata reina un ambiente di stress, e resultado final tabata sumamente positivo. En total a tuma luga mas di diestres reunion cu a resulta hopi constructivo. E encuentronan aki a brinda e sector e oportunidad tan spera pa duna un splicacion amplio y transparente di e realidad riba e tereno y un apertura cu Minister Herde tambe a sa di aprecia.
Pa Marvin Kelly representante di Tour Operators Uni, e punto di mas grandi y importante den e reunionnan aki no tabata solamente señala e problemanan existente, sino presenta solucionnan concreto.

Como operadornan cu ta uza e zonanan di naturalesa tur dia, nan tin un bista directo di kico realmente ta pasando, cual ta e berdadero causanan di daño of destruccion, y con por atende cu esakinan di manera efectivo.
E reunionnan a habri porta no solamente riba e parti logistico, pero tambe pa mustra con e operadornan ta traha hunto pa cuida e zonanan en cuestion,” Kelly a splica. Pa e empresario, tabata fundamental pa comparti informacion y educa e instancianan envolvi riba con e industria di tour ta opera realmente, evitando asina mal comprendemento.
Dialogo necesario cu DOW y Departamento di Naturalesa y Medio Ambiente (DNM/DIP)
Un aspecto crucial di e proceso tabata di por a sinta na mesa cu diferente departamento clave, entre otro Dienst Openbare Werken (DOW). Segun Kelly, DOW ta hunga un rol sumamente importante, specialmente mirando cu anteriormente tabata circula diferente rapport tocante e industria di tour sin cu e operadornan a haya e oportunidad di scucha nan banda di medaya of duna nan splicacion.
Di dos luga, e reunion cu e departamento encarga cu medio ambiente (DIP)tambe a resulta di gran balor, mirando e recomendacionnan cu a keda presenta na Gobierno. E espacio di dialogo aki a permiti tur partido absorbe e informacion necesario, ordena e puntonan di atencion y duna splicacionnan fundamental.
“Mi rol tabata mas bien pa papia di e problemanan, pero mas cu tur cos, enfoca riba kico ta e solucion y con nos por ehecuta esaki conhuntamente,” Marvin Kelly a conclui, enfatisando e compromiso di e sector pa sigui colabora na bienestar di Aruba su naturalesa y turismo.