Ay di esnan cu ta pensa cu nan por tira piedra sconde man y haci cosnan scondi y kere cu nunca e lo sali na cla, pasobra e palabra di Dios, ta priminti tur hende lo siguiente:
Pasobra no tin nada scondi, cu lo no wordo revela, ni nada secreto cu lo no bira conoci y sali na cla.( Lucas 8:17).
No tin nada tapa cu lo no wordo revela,y nada scondi cu hende lo no haya sa. P’esey tur loke boso papia, den scuridad lo wordo tendi den claridad,y loke boso papia keto, keto den e cambernan mas paden, lo wordo proclama for di riba dak.
No ta existi crimen perfecto , ni maldad y inmoralidad cu Dios Todopoderoso lo no saca na cla.
Tur esnan cu ta tuma malo haci bon, of ta coopera cu inhusticia y inmoralidad, lo sali na cla pa asina nan duna cuenta na Dios.
Pesey no sigi huzga prome cu tempo, ma warda te ora Señor bin. Kende lo trece na cla e cosnan scondi den scuridad, y descubri e intencionnan di curason di hende y e ora ey cada hende lo ricibi su elogio for di Dios.( 1 Corintionan 4:5).
For di scuridad E ta revela misterionan, y ta trece scuridad profundo na lus.(Job 12:22)
E ta kita inteligencia for di cabesantenan di e pueblonan di tera, y ta haci nan cana dwaal den un luga desola, unda no tin caminda.( Job 12:24).
Dios nunca por ricibi sorpresa di hende, ta hende lo ricibi sorpresa di Dios, hende nunca por gaña of haci bofon di Dios, pasobra tur locual hende sembra nan lo cosecha. ( Galationan 6:7).
P’esey sin ningun clase di miedo , duda, of manipulacion nos mester pone nos hubentud bon na altura di e palabra di Dios, pasobra e tempo di cos di mucha mal cria, cos di baldadi, of chansa barata a bay for di moda, locual tabata wordo tolera un tempo, awor no ta wordo tolera mas, tur cos tin su consecuencia tardi of tempran.
Serca Dios tin sabiduria y poder, conseho y comprendemento ta pertenece na Dios. Mira E ta basha abao, y esey no por wordo lanta mas, E ta coge hende preso, y no por tin liberacion pe.( Job 12:13-14).
Ta solamente Dios por libra nos di e tempo trabahoso den cual nos ta biba, ta solamente cu obediencia na Dios nos lo tin victoria.
Esun cu bisa mi: Mi conoc’E y no ta warda su mandamentonan, ta un gañado y e berdad no ta den dje,ma esun cu warda Su palabra , den dje e amor di Dios a wordo perfecciona berdaderamente. ( 1 Juan 2:4-5)
Pasobra no tin nada scondi cu lo no wordo revela, ni nada no a keda teni secreto, cu lo no sali na cla. Si un hende tin horea pa tende, lag’e tende.( Marco 4:22).
Sabiduria di Dios ta riba tur cos, p’esey si un hende tin mester di sabiduria lage pidi Dios, Kende ta duna na tur hende generosamente y sin reproche.
Pasobra locual hende ta yama sabiduria di mundo, ta contene tur sorto di maldad, envidia,y falsedad,
Den tur cos nos mester realisa cu Dios, ta Soberano, y cuanto cu hende por pensa cu nan por laga Dios afo for di nan asunto, pasobra nan ta bon na altura cu Dios no ta di acuerdo cu nada cu ta contene impuresa. Dios lo tene nan responsabel, pasobra Dios no ta chansa.
Laga nos tur ta fiel na Dios, y aparta for di maldad.
Sinceramente, Pastoor Marcel Balootje.
