Grupo di baila Danza Aruba ta bayendo e aña aki Boneiro pa forma parti di Dia di Rincon. No ta prome bes cu nan ta bay, pero e biaha aki e grupo ta mas grandi. A tene y ta teniendo diferente training pa asina por ta bon prepara p’e dia di presentacion.
Ceslin Yarzagaray, propietario y instructor, a indica cu e preparacion tabata hopi duro, pasobra nan a haci hopi cos door di bende cuminda. A haci esey pa asina yuda nan un poco pa bay Boneiro.
Nan a train hopi duro. Danza Aruba ta bay baila tres tipo di baile, cual ta Danza, Tumba y Wals. E grupo ta consisti di diesseis bailado. Pa loke ta e cantidad di presentacion, Yarzagaray a splica cu na momento nan yega e presidente di Dia di Rincon lo dun’e informacion di e presentacionnan.
E aña aki Boneiro ta celebra 35 aniversario di Dia di Rincon. Nan a yega di bay presenta dos biaha caba. Un biaha mas Yarzagaray a dicidi di traha un plan pa asina bolbe bay presenta na Boneiro en conexion cu e 35 anual di Rincon.
Ceslin Yarzagaray ta gradici na tur e bailadonan cu a haci nan maximo esfuerso pa prepara p’e biahe di Boneiro. Tambe e ta gradici na señora Gaby, kende ta esun encarga di a cose tur e pañanan cu nan ta bayendo cu ne Boneiro, mientras señora Dora a percura pa traha e flornan.
