Ilusion ta un pensamento cu e enemigo ta pone den mente di hende pa desvia nan for di e berdad, y laga nan pensa cosnan cu Dios no ta aproba, y reta Dios pa medio di orguyo y arogancia.
Ora ilusion no wordo logra e converti su mes den desilusion. Pasobra tur locual Dios a bisa ta berdad y no ta cambia, y asina un hende ta bay contra e berdad di Dios e ta biba di ilusion.
Señor a duna e mandato pa lanta un comunidad di fe y no di ilusion, e palabra mester wordo predica pa tur hende por sa cu ta pa gracia nos tur ta salba pa medio di fe.
Tur hende mester sa cu Cristo Hesus ta e unico caminda di berdad y bida y ningun hende no por yega cerca e Tata sino ta pa medio di Cristo Hesus.
Bo no por ricibi salbacion sino ta pa medio di Cristo Hesus.
Ningun hende no por cambia e fundeshinan di norma, balor y santidad estableci pa Dios, mundo por cambia , pero e palabra di Dios nunca lo cambia.
Nos Señor Hesus a papia un palabra cu nos no por lubida Juan 17:17: Santifica nan den e berdad, bo palabra ta e berdad. Esey ta nifica cu e palabra di Dios mester ta mas importante pa nos cu locual hende ta bisa.
Romanonan ta papia cla bisando: Pasobra door di gracia duna na mi,mi ta bisa cada un di boso,pa no pensa mas halto di su mes, cu e mester pensa: ma mas bien pensa di su mes cu sano huicio di acuerdo cu e midi di Fe , cu Dios a duna .
Tin hopi trosedor di palabra di Dios cu ta yena hende cu ilusion, en bes di bisa nan e berdad, pero tin cosnan cu hende mester sa y no lubida, cu sin pas y sin santidad ningun hende lo mira Dios.
No tin crecemento sino tin arepentimento, pasobra Dios conoce cada curason y cada pensamento, y asina ningun hende por haci bofon di Dios.
Pasobra tur cu ta naci di Dios ta vence mundo, y esaki ta e victoria cu a vence mundo, nos fe.
Enemigo lo haci tur locual ta posibel, pa Fe di hende,tambalia y kere den cosnan cu no ta existi,tambalia y reta Dios, y cay den desilusion.
Pasobra den 2 Thesalonisensenan 1: 9-12 e palabra di Dios ta bisa lo siguiente:Y cu tur e engaño y inkietud pa esnan cu ta perese, pasobra nan no a acepta e amor pa e berdad, pa nan por wordo salba. Y pa e motibo aki Dios lo manda riba nan un influencia di eror,pa nan kere mentira.
Pa nan tur wordo husga, kendenan no a kere e berdad, ma a hiba gusto den e maldad,
Locual ta para scirbi ta locual ta wordo ripiti den Galationan 5:19-21 y 1 Corintionan 6:9 y Romanonan 1:18-32. Tur esaki y mas ta pa preveni hende di wordo desilusiona.
Pasobra Dios a stima mundo asina tanto, cu E a duna su Yiu unigenito, pa ken cu kere den Dj’E no bay perdi, ma tin bida eterno.
Tur hende cu no acepta esaki, ta cay den desilusion, pasobra nan no a acepta e amor di Dios, nan a rechasa e plan di salbacion cu Dios a manda pa henter mundo.
Nos mester ta masha cauteloso cu esaki , pa asina guia nos cas y nos famia den e caminda di Dios.
Ta momento pa nos drenta den oracion, y pidi Dios su misericordia pa henter mundo.
Sinceramente, Pastoor Marcel Balootje.