Vacation Rentals Professionals Aruba (VRPA) ta atende e tema preocupante rond di huurmento di casnan vacacional y vivienda pagabel na Aruba. E organisacion ta reconoce e importancia di e diferencia entre e mercadonan ey y ta enfatisa e necesidad di regulacion responsabel pa mantene pa mantene un balans cu ta apoya tanto e economia local como e necesidad social.
Diferenciando huurmento di casnan vacacional for di vivienda pagabel
VRPA ta clarifica cu casnan vacacional pa huur y casnan pagabel ta representa dos mercado diferente, cu caracteristicanan diferente.
Un cantidad considerabel di vivienda vacacional na Aruba ta propiedadnan di luho, mientras cu viviendanan pagabel ta sirbi un mercado diferente. Mester reconoce e diferencianan pa por logra un regulacionnan efectivo.
REGULACION GLOBAL
E combersacion rond di regulacion di vivienda vacacional no ta algo unico di Aruba. VRPA ta señala cu na otro pais y ciudadnan e regulacion excesivo a trece cu ne consecuencianan negativo y e estudionan haci ta mustra cu prohibi e huurmentonan a corto plaso o e asina yama Airbnb no a conduci na caida di prijsnan di huur, e prijsnan a sigui subi, manera antes, debi na gastonan di construccion y otro factornan. Culpa vivienda vacacional no tabata e contesta y a causa mas daño na e respectivo economianan. VRPA ta sinti cu mester evalua e situacionnan ey, pa cual e asociacion ta conseha pa yega na un acercamento balansa pa evita resultadonan asina na Aruba.
CONTRIBUCION NA ECONOMIA
Vivienda vacacional ta hunga un rol importante den economia di Aruba. Di acuerdo cu un estudio profundo realisa riba e isla, e tipo di acomodacionnan aki ta representa un 20% di Aruba su GDP. E contribucion aki ta mustra e necesidad pa brinda apoyo na e industria mientras cu na mesun momento ta maneha su crecemento di forma responsabel.
Segun un estudio di Universidad di Amsterdam, realisa riba peticion di Departamento di Asuntonan Economico di Aruba, 70% di e viviendanan vacacional ta propiedad di ciudadanonan local y cu ta un oportunidad importante pa e localnan beneficia directamente di turismo y di e placa cu ta drenta directamente den nos economia, y cu ta haci e industria aki asina crucial.
Na momento cu cada persona cuminsa cumpli cu nan “fair share”, por uza e surplus directamente pa financia proyectonan di vivienda pagabel y e ora lo ta trahando direccion di solucionnan real.
VRPA SU RECOMENDACIONNAN PA REGULACION
E asociacion di VRPA ta na fabor di regulacion responsabel, reconociendo e necesidad di un balans cu mester yega na dje pa evita potencial daño na e economia debi na un regulacion excesivo.
VRPA tambe ta kere cu un regulacion eficaz lo mester concentra riba cobramento eficiente di impuesto, contribuyendo na e economia local y atende temanan manera e crisis di vivienda pagabel. Mal regulacion lo crea “negoshinan scondi” y tur hende lo perde den esaki. “Cu bon regulacion tur hende lo sali ganado.”
PRIORIDAD DEN REGULACION DI IMPUESTO
Un di e areanan clave di enfoke di VRPA ta regulacion fiscal. E asociacion ta kere cu sigurando cobramento adecuado di impuesto for di e viviendanan vacacional, por genera suficiente entrada pa atende cu diferente temanan social, incluso esun di e crisis di vivienda pagabel. Un porcion di e impuestonan ey por bay pa crea solucion pa e temanan aki cu ta presiona.
COLABORACION CU STAKEHOLDER
VRPA ta compromete su mes pa colabora cu gobierno y stakeholder pa desaroya regulacionnan efectivo. Desde 2015 e asociacion ta colabora activamente cu oficina di impuesto di Aruba pa crea un sistema fiscal husto y sostenibel pa viviendanan vacacional. “E echo cu no ta verifica y aplica tur e leynan no ta culpa di e industria. Mientras cu no establece consecuencia, lamentablemente, semper lo tin personanan cu no ta haci e cosnan corecto y lo tuma un actitud di “ban spera y mira kico ta pasa”. Y esaki ta costa Aruba miyones di dollar cada aña y e no ta husto pa esnan cu si ta cumpli.”
VRPA kier traha estrechamento cu tur partido envolvi pa sigura cu leynan ta apoya tanto e industria di huur di casnan vacacional como e necesidadnan di e comunidad di Aruba.”
