Tur bishitante di e Open Dag na Marinierskazerne Savaneta por a disfruta di diferente actividad y demostracionnan durante dia. Cuerpo di Bombero tambe tawata presente pa duna informacion y splica un poco mas di nan ekipo di trabou y tambe por a admira nan vehiculonan.
Grandi y chikito por a presencia un demostracion di un scenario caminda un persona cu ta keda pega den un auto despues di un accidente ta wordo libera door di e bomberonan. E bomberonan a corta e auto di forma strategico pa libera e persona y dun’e prome auxilio.
Despues a sigui un demostracion con nos Cuerpo di Bombero ta combati candela. E scenario a cuminsa ora cu un auto a pega candela. Na yegada di e brandspuit na e sitio, por a observa cone bomberonan a controla e situacion y a traha den ekipo pa combati y paga e candela.
Cuerpo di Bombero ta sumamente contento di por a forma parti di e exitoso Open Dag di Marinierskazerne Savaneta y di por a mira e entusiasmo di e bishitantenan. E bomberonan a haya e oportunidad pa por a comparti y demostra na e bishitantenan kico tur ta e trabou di nos Cuerpo di Bombero.
