Di parti di SVb, ta kere cu a yega e momento cu a wak diferente iniciativa, cu a tuma den e sector pa trata di contene y reduci absentismo, pero cada biaha ta ripara cu no ta bay yega leu.
Tabata tin caso cu a bay over na e prome dia di AO controla. No tabata cu e cantidad di hende cu ta yega cerca dokter a aumenta te cu 60 y ora yega 60 pa un dokter controla, ya e control no lo ta mucho efectivo tampoco.
Director di SVb, Edwin Jacobs, ta indica cu a yega e momento pa cuminsa pensa si tin cu bay uza e compensacion financiero como un medio pa demotiva notificacion di AO. Ta kere cu e structura di 100% durante dos aña por reduci, bayendo den direccion di sector priva.
E ta keda un reto pa gobierno. E no ta facil. Gobierno ta un dunado di trabao grandi cu hopi departamento. No ta facil pa coordina. Ademas e leynan cu ta rigi e derecho laboral ta hopi amplio y bo ta sinti e tendencia di miedo pa aplica full bon, pasobra bo no sa kico por bisabo. Semper un trahado por bay corte. No ta un reto facil pa gobierno, pero mas y mas si ta bira visibel cu tin cu haci algo cun’e, pasobra e cantidad di recurso di comunidad cu no ta wordo bon uza, ta hopi. Esey no ta hustificabel den e temponan aki cu ta bibando aden.
Diferencia di AO melding
E notificacion ta igual pa tur persona, sea ta Gobierno of sector priva. E di dos dia den sector publico, tin cu pasa pa control. Sector priva ta pasa di tres dia pa control. E diferencia tambe ta esun di cantidad di cuanto ta wordo compensa ora cu ta cu AO.
Un control mas fuerte
Segun Jacobs, mester bay analisa y studia mas specifico con e situacion aki ta. Ta mira si na nivel internacional, semper tin un diferencia cu e sector publico ta un tiki mas cu sector priva, pa motibo tambe di e entorno cu sector publico ta traha aden. E cantidad aki ta hopi grandi y ta mira den e departamentonan cu tin cu duna servicio continuo, ta pone un presion enorme y ta esun cu tambe ta conduci na pago di overtime. Tin cu mantene un cierto minimo nivel di ocupacion di trahado pa cumpli cu reglanan internacional y reglanan di siguridad.
Esey ta e presion cu tin pa loke ta gobierno. SVb a cuminsa haya peticion di departamentonan pa combersa riba e tema aki. Ta mas cu dispuesto pa sinta y duna un man. Tabata tin un proyecto di prueba hunto cu DRH. Esey lo mester bin bek, segun Jacobs. Pero e ta un reto grandi. E no ta un reto facil. E problema di absentismo den gobierno no ta un problema di ayera, sino un problema di hopi aña. Pesey na 2007, gobierno a tuma e decision di pas’e pa SVb y den e ultimo 12 añanan a haci esfuerso pa hunto cu Departamento di Recurso Humano, a capacita e hefenan di departamento, stimula nan pa hiba un maneho pa maneha absentismo, y no solamente administra absentismo.
