Awe nos a recorda 33 aña di fayecimento di Betico Croes. Mainta a pone krans na su kelder na Santa Cruz. A bin hunto den diferente grupo di persona. A bin hunto como famia. A bin hunto como partido MEP, como e partido cu el a funda y a bin hunto como gobierno, mirando cu Betico tabata un gran estadista.
Pa prome minister, Evelyn Wever-Croes, e tin un nificacion hopi special. Betico tabata su padrino su omo. E tabata hopi chikito tempo cu e tabata den politica. E por a mira di leu con el a haci’e. Pero sigur tabata un inspiracion ora cu el a mira tur su grabacion y palabranan cu el a laga atras.
Como miembro di famia, prome minister a gradici tur esnan cu a keda record’e, pasobra e ta algo hopi grandi. Nan ta bisa cu ora un hende fayece e no ta muri. E ta muri ora cu lubid’e. Den e caso aki ta bunita pa mira cu Aruba no a lubida Betico.
Nos ta un isla chikito riba mapa mundial, y significante. Sinembargo a conoce un politico asina grandi di taya. Hopi pais ainda ta desea pa un persona asina nace cerca nan.
Tabata sigur un dia hopi bunita, segun prome minister Evelyn Wever-Croes. Den nomber di gobierno di Aruba tambe, e mandatario a gradici tur esnan presente cu tabata tey, tambe pa nan atencion y semper record’e.
Manera cu el a bisa mainta den su discurso, prome minister a comenta cu nos pais ta pasando den retonan grandi. Retonan interno, retonan regional, di crisis di Venezuela, cu retonan internacional.
Si nos wak bek e tempo aya, Aruba a lucha pa su status aparte, ta e union a haci nos fuerte. Y ta sigur cu e union lo yuda nos e biaha aki tambe.
Santo sacrificio di misa
Tur aña ta haci un misa anochi. Ta haya menos hende ta bin mirando cu no ta tur hende ta di religion catolico of no ta kere den bin misa. Semper ta e mesun grupo. Grupo di famia, grupo di sostenedor, ta bunita, chikito, intimo. Esey tabata e dia di awe, segun prome minister.
