Trahadonan den cuido, esta di Hospital, IMSan, SABA, Respaldo y di Laboratorio Nacional awor tin e mesun CAO, cu un cantidad di adelanto den beneficionan secundario. Riba dje, tur trahado, riba 1300 persona, lo cobra un “signing bonus” na mita di januari proximo. E contracto colectivo ta vigente for di aña 2019 pa 2021, pues tres aña largo.
Sindicato ABV cu e logro historico aki ta logra un solo CAO pa un di e gruponan mas grandi di trahado sindicalisa di nos isla, tur den e mundo di cuido y ningun di nan cu status di “ambtenaar”. Otro aña lo habri negosacion separa riba perdida di poder di compra, conoci na Hulandes como “indexering”.
Cambionan mas drastico ta den nan sistema di pensioen y den un seguro nobo, cu poco compania tin, cu ta sigura salario di e trahado den caso cu SVb keur nan af pa sigui traha. Nan lo cobra 70% di nan salario te dia nan baha cu pensioen.
