Do It Center ta cla pa un reto nobo cu lo ofrece su clientenan y comunidad di Aruba en general
un variedad di producto. Exito y Do It Center Aruba a cera un acuerdo di aliansa strategico!
Frans Ponson, gerente di Do It Center, a duna di conoce cu e acuerdo aki ta algo grandi y sigur
algo nobo pa Do It Center. Tur hende por corda cu e compania a inicia como General Store
pues un compania chikito. Sinembargo, famia Ponson a keda inverti durante e añanan y cera
acuerdo grandi cu Do It Center.
Despues nan a bira e prome Super Do It Center mirando cu a inclui producto di cuminda y
alimento den e negoshi. Awo nan a firma cu un grupo grandi, Exito na Colombia, cu ta forma
parti di e grupo Casino di Francia. E acuerdo aki lo permiti Doit Center yega na diferente
producto rond di Latino America na un prijs mas economico. Ademas, Frans Ponson a comenta
cu, lo por tin un contacto directo cu e fabrica en caso cu kier laga traha un producto specifico pa
Aruba.
Esaki ta haci cu Super Do It Center ta alcansa un posicion mas grandi ofreciendo mas opcion y
posibilidad pa e pueblo di Aruba.
Laurent Guy Zecri, Corporate Manager of Strategic Alliances di Grupo Exito a splica cu e
compania ta un empresa Colombiano cu financiamento Frances y cu actualmente nan ta e
grupo di retail mas grandi na Colombia y cu ta duna trabou na alrededor di 37 mil persona. Pa
Aruba e acuerdo aki ta importante pasobra e lo duna nos acceso na un mercado nobo mirando
cu Aruba ta cumpra for di Merca of Europa. E capacidad di produccion ta hopi mas barata,
esaki lo por yuda cu e inflacion.
Na Exito bo por haya tur cos cu bo mester, desde cuminda, paña, alcohol, tecnologia,
productonan di beyesa y mascota. Ademas di esaki por haya producto pa cas tambe.
A funda Exito na aña 1949 y awendia ta maneha 2606 tienda tur rond di Colombia, Uruguay y
Argentina. Nan ta emplea riba 40.000 empleado.
Eric Ponson a start su historia comercial na Aruba hopi aña pasa come trahado na General
Store, un compania cu ta existi pa mas di 90 aña caba. Na dado momentp el a cumpra e
negoshi di articulonan electrico over. Na aña 2010 a habri e prome Do it Center na Camacuri,
conoci como un marca internacional un Hardware Store mientras cu na aña 2017 a crea Super
Do it Center, e prome na mundo, cu ta conbina un hardware store y un supermercado. E
negoshi, cu awendia ta emplea riba 200 trahado, lo sigui den e mesun concepto, solamente cu
ta añadi e lineanan di producto Exito den nan variedad cu ta ofrece clientenan. Famia Ponson
ta convenci cu asina lo por ofrece mas y miho producto na un prijs mas competitivo.
