Fiscal ta sorprendi: A reuni cu famia di victima debidamente

Ministerio Publico a sigura cu nan ta duna hopi balor na e atencion special pa cu victimanan, conoci como e “benadeelde partij”. Y a accentua cu den e caso aki no ta diferente. P’esey, e critica cu nan a haya awe pa no ta duna famia di e victima di accidente fatal, no ta na su luga.

Dia 27 di november 2022 un hoben a pasa atropeya señora Ana Rosa Montaño Martinez riba Linea Park, cu consecuencia cu el a fayece. E chauffeur, un stranhero indocumenta y sin rijbewijs valido, a opta pa sigui core y a laga e victima benta pa su cuenta atras. Pero awo e famia ta demanda pa husticia pa nan pareha y nan mama. E yiu a bula di Republica Dominicana pa Aruba, pero no ta tende nada di Ministerio Publico. E yiu, Raisy Morillo Montaño, tin hopi inkietud pa loke ta e caso aki. Husticia di Aruba no ta manera Republica Dominicana y e no por duna siguimento n’e esaki.

Pero, contrario na locual e yiu a bisa publicamente den un entrevista cu 24ora.com, Ministerio Publico a sigura cu recientemente fiscal a sinta cu yiu y pareha di e defunto y a splica nan con leu e investigacion tabata te na e momento ey. E combersacion a bay bon, na parecer di fiscal. E reunion tabata na Spaño pa sigura cu nan a compronde bon. Fiscal a haci algun palabracion cu e famia, entre otro cu lo topa di nobo cu nan prome cu e caso bin dilanti. Di mes nan tur dos lo haya un oproeping como nabestaande y benadeelde partij den e caso aki.

Ministerio Publico lo topa cu nan prome cu e caso “pro forma” pa tene nan na altura di con ta bayendo y prome cu e caso inhoudelijk pa ademas prepara nan pa e dia ey den Corte. Di mes nan como benadeelde partij tin derecho pa claim. Riba dje e pareha di e defunto a papia varios biaha caba telefonicamente cu Ministerio Publico. “Si nan tin pregunta, asina fiscal a palabra tambe cu nan, nos porta ta habri. O.M. ta pone hopi balor riba bejegening di e benadeelde partij y den e caso aki no ta otro”, asina Ann Angela a sigura.