Prepara e futuro di un partido ta exigi identifica, forma y guia un ekipo cu por asumi responsabilidad. Esaki tabata e mensahe central di parlamentario Stephany Sevinger durante Congreso AVP 2026 na Marriott Ballroom, caminda el a combina un reflexion profundamente personal tocante su tata, Benny Sevinger, cu un yamada pa mantene e trabou colectivo como fortaleza di AVP.
Su intervencion a tuma como punto di salida e imagen- y palabranan di Watty Vos durante congreso di 1999, presenta na e encuentro. Sevinger a destaca cu, casi tres decada despues, e mensahe tocante futuro, hubentud y preparacion di e siguiente generacion ta sigui relevante.
Segun Sevinger, e enseñansa ta cla: futuro di un partido ta pidi mas cu preparacion di un sucesor. Ta necesario forma un team, duna hende oportunidad y prepara nan pa e dia cu nan mester carga responsabilidad.
Un legado cu a cuminsa na cas
Pa Sevinger, e tema di relevo tin un nificacion personal. El a comparti cu esaki tabata e prome congreso den cual su tata no tabata presente, expresando cu e tabata sinti su ausencia y cu e ta spera pa pronto tin e banda di nan atrobe.
El a splica cu politica a bira parti di su bida door di e ehempel cu el a mira na cas. Su tata no a impone un caminda politico; su manera di sirbi, lucha, sacrifica, cay y bolbe lanta a mustr’ e nificacion di compromiso cu Aruba.
“Hopi hende conoce Benny como un di e pilarnan banda di Mike. Ami, prome cu tur cos, a conoce como mi tata”, Sevinger a expresa.
Como e miembro mas hoben di e fraccion, el a reconoce cu asumi e responsabilidad aki por ta intimidante. Alabes, casi henter su bida den AVP, creciendo entre miembronan, scuchando nan storianan y presenciando tanto victoria como dificultad, a duna ne un conexion profundo cu e partido y su hende.
Sevinger a honra e homber- y muhenan cu durante generacionnan a entrega tempo, energia y talento pa sirbi Aruba, hopi biaha poniendo asuntonan personal na un banda. El a pidi un aplauso pa esnan presente y pa esnan cu, ainda no tabata fisicamente den e sala, nan trabou ta sigui forma parti di e Aruba di awe.
Mike Eman den un otro rol
Tocante e transicion di liderazgo na Wendrick Cicilia, Sevinger a reconoce e 25 aña durante cual Mike Eman a guia AVP, yuda lanta e partido, forma un ekipo y compaña su miembronan den victoria, derota, gobierno y oposicion.
El a presenta e cambio di rol di Eman como continuidad di su responsabilidad pa guia, forma y sostene e ekipo cu ta sigui. E lider nobo, alabes, ta asumi su tarea cu un team y cu hende rond di dje dispuesto pa traha.
“Relevo nunca ta solamente un persona cu ta pasa un posicion pa otro. Relevo ta un generacion cu ta bisa e siguiente: ‘Nos a prepara e caminda. Awor boso bay cana’”, el a señala.
Modernisa cu e esencia firme
Sevinger a expresa cu su generacion ta acepta e reto cu honor, cu e compromiso di defende e balornan di AVP, modernisa unda ta necesario y realisa cambio sin perde e esencia di e partido.
Su yamada na miembronan tabata tambe un invitacion pa sigui participa activamente den formacion di e representantenan nobo. El a pidi pa nan sigui duna orientacion, recorda e proposito di servicio y hala atencion ora tin espacio pa haci cos miho.
“AVP nunca tabata un solo persona. AVP ta un team. Semper e tabata. Y esey ta nos fortaleza.” Pa Sevinger, e amor comparti pa Aruba ta uni hende di diferente edad, experiencia y opinion den e disposicion pa traha pa e pais. E prueba di e relevo di awe lo ta den e preparacion cu e generacion actual ta ofrece na esun cu ta sigui: forma hende cu un dia por ricibi e flambeu, cla pa continua e trabou.
