Durante Congreso AVP 2026, celebra na Marriott Ballroom, parlamentario Dennerich Kelly a destaca cu relevo ta un responsabilidad di cuida e legado ricibi y prepara e organisacion pa esnan cu lo bin despues. Su intervencion a inclui un reconocemento na tur esnan cu a sirbi e partido durante añanan y e presentacion di e directiva nobo, den e congreso caminda liderazgo di AVP a pasa na Wendrick Cicilia.
“Relevo no ta simplemente un cambio di nomber. No ta simplemente un cambio di cara. Y sigur no ta djis un punto riba agenda di un congreso. Relevo ta responsabilidad”, Kelly a expresa.
Den su discurso, Kelly a señala cu e momento aki ta invita e partido pa wak bek y tambe wak dilanti. El a recorda cu e generacion actual por sigui cana danki na e caminda cu otronan a traha prome, y cu relevo ta pidi reconocemento pa e origen y trayectoria di e organisacion.
Kelly a pone enfasis riba e espacio cu experiencia y hubentud mester comparti. El a destaca cu e responsabilidad di sirbi ta pertenece tanto na esnan cu tin añanan di experiencia y sabiduria pa comparti, como na e hoben cu ainda no tin tur contesta, pero cu tin e curashi pa lanta y ofrece su servicio.
“Experiencia no mester disparce pa hubentud por florece. Y hubentud no mester warda pa experiencia disparce pa haya espacio. Nan por para banda di otro,” el a afirma.
Un parti central di su intervencion tabata dedica na e personanan cu ta sostene e partido cu nan trabou, hopi biaha sin ta den centro di atencion. Kelly a reconoce cu, generacion tras di generacion, homber y muhe a duna nan tempo, energia y experiencia pa mantene AVP uni, organisa y cla pa sirbi.
Prome cu presenta e directiva nobo, el a pidi un aplauso pa e directiva saliente y pa tur hende cu, den transcurso di añanan, a sirbi den un directiva, fundacion of comision di e partido. Asina, el a amplia e reconocemento na e servicio colectivo cu a contribui na continuidad di AVP.
Kelly a presenta e directiva nobo, integra pa Clifford Heyliger, Maria van der Biezen, Wendrick Cicilia, Diana Bikker y Marko Espinosa. El a destaca cu e grupo ta representa continuidad, experiencia y caranan nobo, uni door di e disposicion pa acepta responsabilidad.
Den su reflexion, Kelly a subraya cu ningun generacion ta doño di historia; cada generacion tin e tarea di cuida e legado durante su turno, consciente cu un dia tambe lo entrega esaki na esnan cu ta sigui.
Dirigiendo su palabranan na e directiva nobo, el a felicita nan cu e responsabilidad acepta y a haci un yamada pa scucha, traha cu seriedad y haci bon uzo di e experiencia cu tin rond di nan. Alabes, el a desea nan guia di Dios den nan trabou diario.
Kelly a cera cu e mensahe cu a resumi e esencia di su discurso: “Relevo no ta simplemente ken ta bin despues. Relevo ta kico nos ta entrega na esnan cu lo bin despues di nos.”
