Un accidente cu candela por cambia e bida di un mucha den un fraccion di segundo. Pa muchanan cu a sufri kemadura y mester tratamento specialisa, Aruba Shriners Club ta brinda asistencia pa facilita nan acceso na tratamento medico na Merca, sin costo pa e famia.
E informacion aki tabata comparti diadomingo durante e actividad di Open Dag di Siman di Prevencion di Candela na Brandweer Aruba. E presidente di Aruba Shriners Club, Stanley Brown, a splica cu e organisacion ta forma parti di Shriners International y ta dedica su trabou, entre otro, na yuda muchanan cu a sufri kemadura.
Brown a splica cu, den caso cu un mucha na Aruba sufri un kemadura y mester di tratamento specialisa na Merca, Shriners por yuda pa manda e mucha pa Merca. E menor ta biaha acompaña pa un mayor of un familiar, mientras cu e tratamento medico ta cubri completamente, sin costo pa e famia.
E asistencia aki ta representa un apoyo importante pa famianan cu ta enfrenta e consecuencia di un accidente grave y cu mester di tratamento specialisa cu no ta disponibel na Aruba.
Colecta di tabs pa yuda muchanan
Ademas di e asistencia pa muchanan cu a sufri kemadura, Aruba Shriners Club ta colecta tabs di bleki. Ta recicla tabs pa genera fondo cu ta destina pa yuda muchanan cu tin necesidad di diferente tipo di ekipo.
Emilio van der Linde, kende ta envolvi den e trabou di Aruba Shriners, a splica cu e colecta di tabs por contribui na e asistencia pa muchanan cu mester di rolstoel, protesis of kruknan pa cana.
Ta smelt e tabnan y procesa pa por genera recurso cu ta uza pa e meta aki.
Pueblo por entrega tabs na Shriners
Aruba Shriners ta haci un yamada na pueblo pa participa den e colecta. Personanan cu tin tabs cu nan kier haci donacion por entrega nan na Aruba Shriners Club.
Van der Linde a splica cu persona por scan e codigo of bishita e pagina di Facebook di Aruba Shriners Club pa pone contacto cu e organisacion. E club por pasa busca e tabsnan, of persona por trece nan directamente na Shriners.
Yamada pa sigui e pagina na Facebook
Pa por yega na mas persona cu nan informacion y actividadnan, Aruba Shriners Club ta pidi pueblo pa sigui nan pagina na Facebook, bou di nomber @ShrinersClub.
Brown a indica cu un di e video nan a alcansa aproximadamente 357 mil visualisacion, mientras cu e pagina tin alrededor di 1.800 siguido.
Segun Brown, tin importancia pa mas persona sigui e pagina, pa asina e organisacion por yega na mas hende y comparti informacion tocante e trabou cu nan ta haci. Pa aworaki, Facebook ta e principal medio social di Aruba Shriners Club.
E directiva di e club ta consisti di cinco persona, bou di liderazgo di presidente Stanley Brown.
Durante Siman di Prevencion di Candela, Shriners Aruba a probecha e ocasion pa comparti informacion tocante e asistencia cu nan ta brinda na muchanan y pa invita pueblo pa contribui na e colecta di tabs.
