Presidente di Parlamento di Aruba, Marlon Sneek, a destaca cu e forsa di un partido ta den su hende y den su capacidad di pasa di un generacion pa otro sin perde su identidad. Durante su discurso na Congreso AVP 2026, celebra na Marriott Ballroom, Sneek a presenta e relevo como un responsabilidad comparti pa honra e trayectoria di AVP y sigui construi su futuro.
Den e congreso, caminda liderazgo di e partido a pasa na Wendrick Cicilia, Sneek a reconoce e contribucion di boluntarionan, activistanan y famianan cu a dedica un parti di nan bida na e movemento politico.
“Un partido ta su hende,” el a expresa, mencionando esnan cu ta duna nan tempo, toca porta, convence un amigo y pone e partido dilanti di nan propio interes. Pa Sneek, e personanan aki ta forma e fundeshi di AVP.
Sneek a subraya cu relevo ta pidi reconocemento pa e caminda cu generacionnan anterior a habri. E transicion mester permiti cu e partido ta siña di e experiencia acumula y ta haya e curashi pa sigui construi.
El a expresa confianza den e talento, energia y ideanan di e generacion nobo, alabes resaltando e balor di experiencia. Segun Sneek, e tarea ta di busca un ekilibrio cu ta permiti diferente generacionnan contribui na e mesun proyecto.
Un punto central di su discurso tabata e importancia di dialogo y espacio pa diferencia di opinion den e partido.
“Un partido fuerte no ta un partido caminda tur hende ta bisa ‘si.’ Un partido fuerte ta un partido caminda hende por bisa: ‘Mi ta mira e cos diferente’, y ainda por sinta hunto, tende otro y busca e caminda corecto”, el a afirma.
Sneek a destaca cu dialogo ta un señal di fortaleza. Aun cu diferente opinionnan y manera di mira un problema, el a recorda cu e proposito comun ta servicio na Aruba, e comunidad y e siguiente generacion, cu e responsabilidad di laga un partido mas fuerte cu esun cu nan a ricibi.
Tocante e decisionnan di e congreso, Sneek a señala cu e cambio di liderazgo, e modificacionnan den statuto y e formacion di un directiva nobo ta forma parti di e apertura di un capitulo nobo. Tras di e decisionnan aki, el a identifica confianza como un elemento esencial: confianza den e generacion nobo, den esnan cu ta carga responsabilidad y den e capacidad di AVP pa evoluciona sin perde su identidad.
Dirigiendo su mensahe na e lider nobo, Sneek a desea Cicilia hopi exito y a pidi pa e mantene presente e activistanan cu ta sali den calor pa campaña, esnan cu ta dedica oranan despues di trabou y e famianan cu a haci sacrificio. El a reconoce tanto esnan cu a gana como esnan cu a perde, resaltando cu nan tur ta forma parti di e historia di AVP.
Sneek a invita e lider nobo pa haci su propio historia cu humildad, disciplina, respet y, riba tur cos, amor pa Aruba. “Un partido no ta bira fuerte solamente ora e gana eleccion. Un partido ta bira fuerte ora e por pasa di un generacion pa otro sin perde su alma”, el a expresa.
Sneek a cera recordando cu e poder di un partido ta den su pueblo. Cu e trayectoria di AVP como base, el a haci un yamada pa traha hunto pa e futuro, culminando cu un deseo di bendicion di Dios y su saludo: “Biba AVP. Biba Aruba.”
