Congreso AVP 2026 a marca un momento importante den historia di Partido AVP. Despues di lidera partido desde 2003, Prome Minister Mike Eman a traspasa oficialmente e liderazgo di AVP na Minister Wendrick Cicilia, marcando asina un siguiente paso den e proceso Era di Relevo.
E relevo ta trata di e liderazgo di partido. Mike Eman ta sigui cumpli cu su responsabilidad como Prome Minister di Aruba te januari 2027.
Durante e Congreso, Minister Melvin Wyatt-Ras a destaca e trayectoria di Prome Minister Eman, su dedicacion na Aruba, su vision y su disposicion pa consulta y dialoga. E momento tabata tambe uno pa reconoce e añanan cu el a dedica como lider di AVP.
Dirigi na Minister Cicilia, Minister Wyatt-Ras a destaca su capacidad y preparacion, asina como e sosten di su famia, su hendenan y Partido AVP. El a subraya tambe importancia di sigui traha conhuntamente y di inclui e hobennan cu awor ta sigui e stapnan di generacionnan anterior.
Pa Minister Wyatt-Ras, e momento aki ta pone enfasis riba continuidad entre generacionnan: experiencia, balornan y responsabilidad cu ta pasa di un generacion pa otro, pa sigui traha pa bienestar di pueblo di Aruba.
Un parti importante den e trayectoria aki ta e atencion pa siguridad social, salud y bienestar di nos grandinan y famianan cu tin necesidad di sosten.
Durante gobierno di Henny Eman, e compromiso cu bienestar di nos grandinan a traduci den decisionnan concreto. Na 1994, Gobierno hunto cu Centraal Bureau voor de Statistiek (CBS) a realisa e prome estudio tocante bestaansminimum na Aruba. Basa riba resultado di e estudio, pensioen tabata redobla durante su periodo na cabes di gobierno.
Den e mesun periodo, Aruba a tuma un otro paso importante den cuido di salud. Na december 2000, e Invoeringsverordening AZV a wordo adopta y na januari 2001 AZV a wordo introduci como sistema general di seguro di salud na Aruba.
E compromiso social ta refleha tambe den nan trabou parlamentario. Na 2021, Mike Eman y Melvin Wyatt-Ras a propone e introduccion di un ayudo financiero pa muchanan cu limitacion cu mester di cuido intensivo. E iniciativa aki a forma e base legal pa e sosten cu posteriormente tabata desaroya pa e muchanan y famianan aki.
Den 2025, mas di 19.000 pensionado AOV y mas di 2.000 persona cu ta ricibi AWW a beneficia di un aumento di AWG 250 pa luna den forma di reparatietoeslag. Den e actual periodo di gobierno, Prome Minister Eman y Minister Wyatt-Ras a sigui traha riba sosten social. Entre otro, e bijstand basico a aumenta di AWG 450 pa AWG 600 pa luna, mientras diferente forma di sosten pa famianan cu yiu na scol a aumenta.
Como Minister di Salubridad, Asunto Social, Cuido di Adulto Mayor y Maneho di Adiccion, Melvin Wyatt-Ras ta sigui traha riba prevencion den salud publico, sosten social, cuido di adulto mayor y maneho di adiccion.
Cu Minister Cicilia na cabes, AVP ta drenta un etapa nobo. Congreso 2026 a formalisa asina e siguiente paso den e relevo generacional di partido.
