AVP ta drenta un etapa nobo cu mr. Wendrick Cicilia como lider di partido, despues cu mr. Mike Eman a dicidi traspasa mando. Durante Congreso, Cicilia, Minister di Husticia mr. drs. Arthur Dowers y Parlamentario John Hart a destaca cu e cambio ta representa mas cu un lider nobo: ta inicio di un “era di relevo.”
Cicilia a describi su nombramento como orguyo y un responsabilidad cu e ta asumi cu compromiso, curashi, determinacion y fe den Dios. Segun e mandatario, su trayectoria politico tabatin un proposito principal: sirbi comunidad.
E lider nobo a señala cu exito den politica no ta gana un eleccion. P’e, exito ta reuni hende, crea union y pone talento pa beneficio di comunidad. El a anima e hobennan pa kere den nan potencial y no laga edad determina kico nan por logra.
Minister Arthur Dowers a pone enfasis riba trabou duro. Segun e mandatario, relevo no ta facil y esnan cu ta asumi responsabilidad awo mester comprende cu liderazgo ta exigi dedicacion. Lidernan cu experiencia por keda pa guia y coach, pero generacion nobo mester haci e trabou.
Parlamentario John Hart a indica cu “era di relevo” tampoco ta limita na cambio di lider. E ta inclui solidaridad, responsabilidad comparti y compromiso pa laga pais miho cu manera a hay’e.
Hart a resumi fundeshi politico di AVP den tres palabra: curashi, vision y responsabilidad. Segun e parlamentario, partido ta drenta un otro era cu un lider y ekipo nobo, pero cu e mesun principionan.
Cu Wendrick Cicilia na cabes, AVP ta presenta e transicion como un combinacion di relevo, experiencia y servicio na comunidad.
Pa mas detaye lesa TREMPAN.
