Durante Congreso AVP 2026, celebra na Marriott Ballroom, parlamentario ir. Carlos Bermudez a destaca cu e cambio di generacion y liderazgo mester cana hunto cu continuidad den preparacion, dialogo y unidad. Den e congreso, caminda liderazgo di AVP a pasa na Wendrick Cicilia, Bermudez a enfatisa cu e meta ta sigui ta bienestar di Aruba y su pueblo.
Den su discurso, Bermudez a señala cu AVP a haci un contribucion enorme na desaroyo di Aruba, basa riba compromiso, vision y amor pa e pais. El a expresa cu cada biaha cu e partido a asumi e responsabilidad pa goberna, e compromiso aki a guia su trabou pa duna pueblo loke e merece.
Bermudez a reconoce cu tempo y generacionnan ta cambia. Cada generacion ta trece pensamento y ideanan nobo, hunto cu otro manera di mira e retonan di e pais. Den e proceso aki, el a destaca importancia di duna hende nobo espacio, scucha nan y permiti nan contribui.
Alabes, el a subraya cu tin practicanan di trabou cu mester ta manteni. Haciendo referencia na e recordatorio di ex presidente di Parlamento, Marco Christiaans, Bermudez a menciona importancia di sinta hunto prome cu reunionnan di Parlamento, evalua loke a pasa y prepara strategianan pa enfrenta e retonan cu ta bin.
“Por tin cambio den pensamento y liderazgo, pero preparacion, dialogo y unidad mester keda firme,” Bermudez a afirma, agregando cu e practica aki mester ta presente tanto den parlamento como den sala di conseho di minister.
Pa Bermudez, representa pueblo y goberna e pais ta un responsabilidad grandi cu ta exigi dedicacion y liderazgo cu un bista hancho. El a describi AVP como un partido di vision y a señala cu, bou di e liderazgo nobo, e trabou mester sigui cu e mesun meta: bienestar di Aruba y su hendenan.
Un otro punto central di su intervencion tabata union. Bermudez a destaca cu Aruba ta di nos tur y cu diferencia di opinion mester ta trata cu respet y amor pa e pais. “Ta NOS ta Aruba!”, el a expresa, enfatisando cu no tin espacio pa desunion riba nos isla.
Durante su discurso, Bermudez a gradici Marco pa su palabranan di motivacion, describiendo ne como un di e baluartenan di Noord y reconociendo su compromiso y aporte na Aruba.
Bermudez a cera cu un yamada na coleganan y simpatisantenan pa sigui hunto, combina experiencia cu energia nobo y vision, y mantene confianza den otro cu un solo meta: “Un Aruba miho pa nos tur!”
