No tin ningun hende cu por tapa locual Dios kier saca na cla, no tin ningun hende cu por stroba man di Dios move, e unico cos cu Dios ta pidi di nos ta humildad y obediencia.
Ora e dos cosnan ey ta presente den nos bida, nos no tin mester di pleita ni discuti, pasobra Dios mes lo bringa pa nos.
No tin nada cu por daña un curason puro y recto, no tin nada pa stroba bendicion di esunnan cu ta cana den luz di Dios.
Cueba di Leon no por a wanta Daniel, candela no por a kima Sadrac, Mesac y Abednego, Goliat no por a cana David, y awe si bo ta pasa den cualkier situacion incomodo, e luz di Dios, e berdad di Dios, e pas di Dios, lo guia bo caminda, y kita tur baranca y haci bo caminda liso.
No tin motibo pa preocupa ora bo sa ken bo ta, y cu ken bo ta cana, pasobra si bo ta cana cu Dios, semper por bini atake di e enemigo, pero Dios lo libra bo di tur cos, pasobra bo ta den e luz di Dios.
Aunke con scur e nubia di maldad por ta, e luz di Dios ta penetra, no ta importa cuanto contrincante bo tin, e bataya ta di Señor, para keto y wak riba Señor, spera riba dje y e lo bringa pa bo.
Tur cos nos por den Cristo, Kende ta duna nos fortaleza, Dios nunca ta yega laat, y Dios no ta laga nada na mita, tur promesa di Dios ta cumpli y tur ta si y amen.
Ta Dios ta esun cu ta lanta hende cu a cay, ora tur hende por bandona bo, Dios t’ey cu bo pa demostra cu e ta Dios, semper Dios tin recurso, y semper Dios tin salida.
Lanta riba y cohe e rapport di dokter y pone dilanti di Dios, bay na bo rudia y presenta bo caso dilanti di Dios, pasobra Dios t’ey pa nos tur hamas lo e laga e husto desampara.
Dilanti di Dios, berdad lo topa cu berdad, pasobra nada no ta bay keda scondi, pasobra e presencia di Dios den bo bida, ta mas grandi cu tur esunnan cu ta contra bo, y hasta Diabel sa esey.
Na unda mi por bay for di bo spirito?
Ma unda mi por huy bay for di bo presencia?
Si mi tuma hala di marduga, si mi bay biba den partinan mas aleha di lama.
Ayanan tambe bo man lo guia mi, y bo man drechi lo cohe mi tene (Salmo 139:7-10).
E wowo di Señor ta caminda vigilando malo y bon (Proverbionan 15:3).
Ami Señor ta scrudinja curason y Mi ta samina mente pa duna cada un segun su conducta, segun e fruta di su hechonan (Jeremias 17:10).
Tur momento cu nos mester di yudansa di Dios, nos mester hinca tur cos den su man, y no sigui lucha riba nos propio forsa, no sigui den nos propio entendimento, pero confia Dios, pasobra manera e solo ta sali mainta cu su rayonan di claridad, asina berdad lo sali na cla, y ningun hende por sconde.
Hesus a bisa Ami ta e caminda di berdad y e bida, ni un hende por yega cerca e tata, si no ta pa medio di Mi.
Hesus a bisa Ami ta e luz di mundo, esun cu cana cu Mi lo no ta den scuridad.
P’esey nos mester cana cu Cristo Hesus, laga E tene nos man, laga E ta nos guia.
E por, E tin poder.
