Parlamentario di AVP, Otami Thomasia, a destaca cu e Era di Relevo mester traduci den oportunidad pa muchanan, progreso pa famianan, cuido pa adultonan mayor y cambio den barionan. Durante su discurso na Congreso AVP 2026, celebra na Marriott Ballroom, Thomasia a conecta e transicion di liderazgo cu e responsabilidad di atende e necesidadnan di pueblo y haci bon uzo di su confianza.
Su mensahe tabatin un base profundamente personal. Thomasia a expresa cu, ora e ta scucha su tanta Carmelita papia di liderazgo y inclusion, e ta reconoce e balornan cu awe e ta carga como parti di un generacion mas hoben, cu su propio bos, ideanan y responsabilidad.
El a describi como un honor e oportunidad di sigui den pasonan di su tanta. Alabes, el a reconoce e influencia di su oma, Nola Browne, kende a traha duro pa AVP y a laga un ehempel di disposicion pa yuda y ta presente pa otro.
“Pa mi, servicio a cuminsa den cas,” Thomasia a expresa. “Mi a crece cu e ehempel cu ora bo por yuda, bo ta yuda. Ora hende tin mester di bo, bo ta presente.”
Den e contexto di e transicion di liderazgo di Mike Eman pa Wendrick Cicilia, Thomasia a gradici Eman pa su servicio y dedicacion na Aruba y na e partido. Dirigiendo na Cicilia, el a destaca cu e responsabilidad grandi cu e ta asumi mester ta sosteni door di un compromiso comparti cu pueblo.
Thomasia a pone enfasis riba un liderazgo cu ta inclui e hendenan rond di dje, scucha diferente opinion y balora experiencia. Pa e generacion nobo, el a pidi tanto espacio pa contribui como responsabilidad pa entrega.
E significado di relevo, segun su mensahe, mester ta visibel den e realidad diario di e comunidad.
“Den e mucha cu haya oportunidad. Den e famia cu por sali dilanti. Den e adulto mayor cu ricibi cuido. Den e bario cu finalmente mira e cambio cu a spera,” el a señala.
Thomasia a destaca cu e trabou di su oma Nola y di tanto otro hende cu a duna nan tempo y curason na AVP ta pone un responsabilidad riba e generacion actual. E confianza ricibi mester ta uza pa sigui sirbi y contribui na un Aruba cu mas oportunidad pa tur.
El a expresa gratitud na esnan cu a sirbi pueblo prome, reconociendo cu nan a habri e caminda cu e siguiente generacion por sigui awe.
“Mi ta cla pa haci mi parti. Pa scucha, pa haci e preguntanan necesario y pa traha te ora nos mira resultado”, Thomasia a afirma.
Cu e compromiso aki, Thomasia a vincula e legado familiar di servicio cu su tarea como parlamentario: honra e generacionnan anterior door di ta presente pa hende y traha pa e cambionan cu comunidad ta spera.
