Dia 1 di november 2018 tabata un dia hopi special pa Aruba, Parlamento a aproba e ley di ortografia di Papiamento den forma unanme. E dia aki tambe un mocion presenta pa parlamentario di POR, Alan Howell a haya e sosten di tur fraccion den Parlamento. Ta trata aki di un mocion pa e examen di trafico cu nos muchanan ta haci na scol wordo realisa na Papiamento y no na Hulandes.
Howell a yega di haci diferente estudio riba e tema y for di esakinan por conclui cu nos muchanan lo compronde e preguntanan miho y lo por tin un resultado final mucho mas halto si e examen aki wordo haci na nos idioma Papiamento.
Na e momentonan aki e unico scolnan cu ta traha examen na Papiamento ta e scolnan special y e dos scolnan den e proyecto piloto multilingual y mirando cu ta trata di un examen haci pa wak e conocemento di e muchanan pa cu reglanan di trafico y no nan conocemento di Hulandes, lo por spera un miho resultado ora esaki wordo haci den nan lenga materno, ademas cu nan lo por aplica esakinan na un miho manera ora nan mes forma parti di trafico.
Teniendo na cuenta e puntonan ariba menciona, unanimamente parlamentarionan a sostene e mocion di Alan Howell pa den aña 2019 e examen di trafico wordo haci na Papiamento.
E parlamentario di POR a gradici tur parlamentario di MEP, AVP, RED y POR pa sostene y vota na fabor di e mocion aki. El a indica cu durante e reunion publico aki por a wak cu a reina un union entre tur parlamentario y cu lo ta ideal pa esaki continua, unda ta traha uni na bienestar di Pais Aruba. “Together we can make it better”.
