E aña aki un biaha mas a tuma luga e Aruba College Fair 2018 y esaki a cuminsa diabierna dia 2 di november. Aruba College Fair Foundation ta contento cu esey, unda cu ta ofreciendo e actividad aki pa 18 aña na studiantenan di Aruba. Ta haci e College Fair cada pasa 1 aña.
Na 2000 a organisa e College Fair pa prome biaha y e aña aki ta haciendo esaki pa 18 aña. Pa aña 2020 esaki lo bay ta uno grandi, Muzaninn Wever, president di Aruba College Fair Foundation a bisa. Nan ta spera cu por celebra esaki mas grandi. Nan ta hopi contento cu tur loke a haci durante e añanan caba y cada biaha ta bin cu scolnan nobo, informacionnan nobo pa studiantenan. E ta kere cu e studiantenan ta beneficia di esaki.
E aña aki nan a bin cu un cambio pa cu e entrada p’e College Fair. Despues di 18 aña ta organisando e College Fair, nan no por a mantene esaki pornada mas. A introduci un pre registracion di 5 florin y si e fecha di pre registracion a pasa, e studiantenan ta paga 10 florin. E suma aki pa cada dos aña nan no ta kere ta hopi.
E evento di College Fair no ta solamente pa studiantenan, pero e ta pa personanan cu kier mehora nan mes sea den estudio of carera. Tambe tin companianan cu ta duna informacion riba ki carera mester, kico nan mester den nan industria. Tambe kico por ta programanan di enseñansa cu nan mes ta ofrece pa crece y ta ofrece studiantenan e oportunidad di mira kico nan por haci mañan. Companianan y scolnan ta duna e studiantenan e informacionnan, cu ta yuda nan tuma un decision miho pa futuro. Asina aki nan no mester gasta hopi placa, na perde hopi tempo pasobra nan a cuminsa un estudio cu no ta pa nan.
Anteriormente door cu e evento tabata gratis, e fundacion no tabatin un idea cuanto studiante tabata presenta, pasobra nan tabata drenta y sali y no tabatin un record di dje. Awo cu ta cobra p’e entrada, nan tin idea cuanto studiante ta presenta. Ta calcula cu diabierna a presenta mas di 1000 studiante aunke no tin un comparacion. Na 2020 lo por duna algo miho. E registracion ta duna nan un indicacion di cua scolnan ta interesa pa bin College Fair. Tambe kico ta e interes di studiantenan, si nan ta buscando algo pa un volgenstudie of un kortstudie. Tambe si nan kier keda na Aruba, bay Canada, Merca of Europa. Tur e informacionnan aki nan ta haya awo, pasobra tin un registracion di studiante y asina por ta miho prepara p’e siguiente evento, door cu sa unda e interes di studiantenan ta.
E fundacion kier gradici Kiwanis Club Palm Beach cu ta un sponsor hopi grandi na e College Fair. Kiwanis tin muchanan hopi na pecho y p’esey ta gradici nan. Tambe ta gradici SETAR NV, e compania nacional di telecomunicacion, y Masy-Fral Aruba NV cu ta sponsor e fundacion desde cu nan a inicia. Ta gradici studiantenan cu ta acudi na e evento, pasobra si nan no ta haya interes pa yega eynan aki no lo tin un evento asina aki. Tambe ta gradici tur scol cu ta bin Aruba tur aña y e companianan cu ta sostene door di participa den e evento.
