Ariba dia di wega 5, Aruba a wordo sacudi den Domino organisa. Diabierna Campeonato Balashi a continua cu un sorpresa grandi, Gold Stone Dewars DT a habraca Old Parr DT for di otro 19 pa 6.
E mucha nan di Shaba a bin dicidi y a pone un show di Domino na Balashi Beer Garden. Old Par DT tin siglos sin ricibi un “pak slaag” asina grandi. Gold Stone Dewars DT a manda e mesahe cla y raspa pa e Campeon nan di 2018, Noord Stars “PIZZA HUT” DT bisando cu nan lo ta e proximo victima. Cu e score monstroso aki Gold Stone Dewars DT a subi ariba e tabla di posicion te na number 3.
Den wega number 2 e Diabierna cu a pasa X-treme DT cu hopi dificultad a logra manda Eagles DT cas cu e score 13 – 12. Un bon resultado sigur pa ambos equipo pasobra X-treme a segura su ranking ariba e tabla di posicion y Eagles DT a limita e daño.
Diadomingo, e mes un dia cu Curacao a wordo elimina den Copa Oro, Ottley’s Strikers DT den pito a surpasa Trappers DT den un Ottley’s Place yen yen. Ottley’s Strikers DT ta steady den su wega, pero e diferencia den score no ta asina grandi cu nan por haci un impacto ariba e tabla di posicion. Den wega 2 Noord Stars “PIZZA HUT” DT facil a pasa ariba Sport Boys DT cu e score 15 – 10. Aparentemente Sport Boys DT a kere cu un minimo di hungador lo ta suficiente pa enfrenta Noord Stars “PIZZA HUT” DT. Aki ta caminda pisca a coi piscado y Noord Stars “PIZZA HUT” DT ta propone Sport Boys DT un derota costoso, asta sapato a cai. Cu e score aki Noord Stars “PIZZA HUT” DT ta fortifica su ranking ariba e tabla di posicion.
E siguiente wega nan lo ta Juli 5 & 7, 2019 na RiverPlate cu e clash entre Gold Stone Dewars DT y Sport Boys DT y e confrontacion entre e number 1 y 2 ariba e tabla di posicion, Noord Stars “PIZZA HUT” DT vs X-treme DT. Pueblo henter ta keda cordialmente invita pa pasa un rato ameno y apoya e hungador nan.
