Trahadonan di ASTEC y otro departamentonan di Gobierno cu ta traha riba tereno di waf di carga na Barcadera ta trahando bo un presion enorme di huma, holor di gas y stof cu ta stroba nan operacion diario. A papia cu Gobierno na mas di un ocasion pa interveni cu WEB pero lo contrario a sosode, Minister di Infrastructura a duna e compania Caribbean Beton tereno eybanda mes pa procesa santo, piedra y cement, haciendo cu e problema riba waf a bira pio en bes di miho!
Ta parce cu e situacion aki lo por bay caba den Corte, awor cu ASTEC, e compania cu ta maneha y opera waf di carga a hinca e asunto den man di nan abogado. Tanten cu no drecha e situacion, nan no por brinda servicio normal, cu tur consenciencia pa economia di nos pais!
Un di e prome retonan ta e huma procedente di WEB. E huma ta contene gas cu ta haci e trahadonan riba waf malo, cu consecuencia cu nan wowonan ta pica of ta sinti nan mes malo. E nivel di AO a crece enorme e ultimo temponan, specificamente dor di esaki. WEB a sinta na mesa cu ASTEC y APA hunto cu ATIA den un reunion cu Conseho di Minister pa atende e problema aki. Ey WEB a sigura di lo baha e nivel di sulphur den nan combustibel pa evita e holor desagradabel cu e ta produci.
Sinembargo empleadonan riba waf no a sinti e cambio priminti dor di Gobierno. Cada biaha atrobe, semanalmente, mester para operacion pa motibo di estorbo. Esaki ta causa cu barconan ta keda pega na Aruba y ta yega laat pa otro destinacionnan riba nan ruta. Esaki mes a conduci cu barconan a hisa nan prijs pa Aruba, precisamente pasobra aki e gastonan a bira hopi halto.
Pero comosifuera poco, ta bin acerca cu Minister di Infrastructura, Otmar Oduber, a caba di duna Caribbean Beton un tereno riba Barcadera pa nan procesa cement, santo y piedra. Awor stof tambe a bira parti di e problema pa e trahadonan riba waf. Ki ora cu barco di santo yega ta un problema y despues e compania, cu base na Venezuela, ta trece piedra tambe cu ta kibra eynan mes cu tur consecuencia di stof den aire.
A busca intermediacion di Gobierno pero parce cu esey no a yuda mucho. A bay na DTI pero tampoco a conduci na e resultado desea. Awo ta asina leu cu a pone e problema den mannan di abogado pa cuminsa un proceso civil. Ta interesante pa sa ken(nan) lo core cu e gastonan adicional dor di e retonan aki.
E trahadonan ta masha disgusta cu nan sindicato STA, cu ultimo lunanan ta den un silencio total pa nan problemanan. A busca tur forma pa haya representacion di e trahadonan pero awo cu a keda cla, no ta sinti e mesun dinamismo manera antes. Ta spera cu esaki lo no tin nada di haber cu preferencia politico pasobra mientras ta “tapa” pa Gobierno, tin trahado ta birando malo tur dia debi cu mester traha bou circunstancianan inhumano.
