Maria Ridderstaat a gana e Festival di Dera Gay cu a tuma luga fin di siman pasa na Tilburg, na Hulanda. Manera tur aña, Asociacion Nos Baranca a organisa e festival aki celebrando nan gran lustro: 30 aña di Fiesta di San Juan na Hulanda. Invitado special tabata Presidente di Parlamento, mr. Ady Thijsen, miembro di Parlamento, drs. Marisol Lopez-Tromp y Minister Plenipotenciario Suplente Eddy Paris.
E festival a cuminsa cu canto di nos himno nacional ‘Aruba Dushi Tera’ pa Maria Ridderstaat. Presidente di Nos Baranca, Mena Maduro a yama e publico presenta bon bini. 
Sra. Maduro a para keto na e lustro di 30 aña y a bisa di ta spera cu e festival por sigi crece, pasobra ta importante pa mantene nos cultura aki na Hulanda bibo. Finalmente sra. Maduro a gradici tur instancianan y personan cu a contribui tur aña na e celebracion aki.
Minister Plenipotenciario Suplente Eddy Paris a felicita Nos Baranca cu e lustro. Como aprecio sr. Paris a haci entrega di un plakkaat na Nos Baranca cu e siguiente teksto “Reconocemento di aprecio y gratitud di Gabinete di Minister Plenipotenciario di Aruba na Nos Baranca cu pa 30 aña ta organisa Fiesta di San Juan na Hulanda, cu un dedicacion y amor grandi pa conserva nos cultura bou di e comunidad Arubano na Hulanda. Minister Plenipotenciario Guillfred F. Besaril”
Un total di cinco cantante a participa e aña aki y e hurado a dicidi cu Maria Ridderstaat tabata esun cu e mihor interpretacion di e cancion di Dera Gai.
E publico presenta por a goza di un programa hopi varia cu a consisti di weganan manera ranca bandera, mata e gai y baile di Dera Gay. Musica tabata na encargo di e banda Saborrr, Jonathan Hovertsz a brinda e publico cu cancionnan popular y grupo do baile di Tilburg New Dymencion a presenta diferente show di baile.
