Dialuna ultimo e shete sindicatonan (SEPPA, SADA, SIMBA, SPA, FTA, SIMAR y TOPA) cu ta representa e empleadonan publico a yega na un acuerdo cu gobierno riba e tema di Indexering. A duna 11.7% pero a partie den dos cual dia prome di juli ta duna un aumento di seis porciento y e restante 5.7% lo ta incorpora den e salario di januari 2025.
Magaly Brito, secretario general di SEPPA, a indica cu desde comienso di januari ya caba nan tabata tin discusion riba ahustacion di salario debi n’e aumento di costo di bida. Nan a continua riba esaki, pasobra na 2019 a inicia caba cu e discusionnan. Pero a bin pandemia, e recorte di 12.6% y diferente otro cos cu a stroba e continuacion di e discusionnan aki. Mita di april tabatin un bay y bin, pasobra e partidonan tabata duna proposicion cada bes y finalmente nan por a yega cerca di algo cu tabata pidi. P’e sindicato tin punto di preocupacion, di cual nan no ta contento completamente. Esey ta debi n’e tema di ‘gelijkgestelden.’
Sindicato di Empleadonan Publico y Priva di Aruba (SEPPA) a indica cu e acuerdo ta un seis porciento di ahustacion di salario pa dia prome di juli 2024. Dia prome di januari 2025 ta duna e resto cu ta e 5.7%. E acuerdo aki ta basa riba un acuerdo di 2018-2023, pues e ahustacion den un periodo di seis aña. P’e empleadonan publico y ‘gelijkgestelden’ e ta nifica cu despues di dies aña ta ahusta e salarionan debi n’e aumento di costo di bida. E premies (Bashi premie, Reparatiepremie y Gelijkbedrag) ta keda vigente y n’e suma di 2.129 florin cada uno.
E sindicalista a indica pa nan ta keda den discusion e ahustacion di salario pa trahado di fundacion, pasobra esaki no a caba. Esaki ta debi cu si ta papia di ‘gelijkgestelden’, e trahado di fundacion manera Casa Cuna, Wit Gele Kruis, SABA, Imeldahof y otro tambe tabata gosa di acuerdo riba Indexering. Esaki ta un principio cu SEPPA semper a para p’e y gobierno tambe a mantene esaki. Pero e biaha aki, gobierno a bin cu e ‘output subsidie’ ta mustra cu e principio aki no ta conta mas. “Si bo mantene bo mes na principio no mester tin nada sksi9rbi pa por haci esaki.”
Ta p’esey SEPPA a acerca gobierno riba e tema aki. A manda carta n’e ministernan encarga. Reaccion ta cu nan lo bay reuni riba e tema aki pa por yega na un solucion. Trahado di tur otro fundacion ta eherce tarea esencial, importante y bunita, semper nan salario ta basa di e mesun forma cu sector publico, semper a haya e derecho riba ahustacion. No ta pasobra gobierno a bin c’un ‘output subsidie’ ta kita e derecho aki.
Un biaha mas ta keda demostra cu ora ta tuma decision grandi manera e ‘output subsidie’, no ta tene na cuenta unda ta perhudica e trahado. Of kier haci esaki cu e intencion di corta gasto riba lomba di trahado. SEPPA ta haya cu esaki ta un berguensa. Pa e motibo ey e lucha pa SEPPA no a termina y ta conta cu sosten di e trahadonan di e fundacionnan.
Indexering ta derecho
Gobierno ta reconoce cu Indexering ta un derecho. Tambe e ta un obligacion moral di un dunado di trabou pa ahusta e salarionan. E aña aki, gobierno a reconoce cu e ta obligacion di dunado di trabou pa tene na cuenta con costo di bida ta afecta su empleadonan y mester yega na un sistematica unda structuralmente ta ahusta e salarionan. Esaki contrario di loke kier hinca den cabes di e empleadonan publico na 2008, unda tabata grita cu Indexering no t’un derecho. P’esaki e sindicato ta gradici tur cu a lucha den pasado y mas ainda na 2008 pa mantene e derecho di Indexering, e ahustacion di salario debi na aumento di costo di bida. Sin e lucha aki na 2008, awe no por papia di Indexering.
