Tabata alrededor di 8:30 pm diasabra anochi riba Dia di Rey, cu bisiñanan a nota cu algo straño ta pasando den bario. Un cantidad di auto a cuminsa aglomera canto di caminda riba Bucutiweg cu ta un caminda sin continuidad, pues e ta limita na mas direccion pasobra cu e ta caba na e cura di Aeropuerto.
E bisiñanan no tabatin un idea di kico tabata pasando y a cuminsa puntra otro ken sa di algo cu por tin den nan bario cu normalmente ta hopi trankil. Pero despues di un rato e cantidad di auto a bira asina hopi cu a blokia nan casnan.
A dicidi e ora ey di yama polis pa averigua kico ta pasando. Nan a informa cu tin un concierto ta tuma luga na e Bar-Restaurant Varadero. A informa polis di kico tabata pasando, cu cantidad di auto di esnan cu a bay e concierto tabata asina hopi cu nan no por a keda para solamente canto di caminda pero a bay over na cera e entrada y salida dilanti e casnan y hasta parkeer riba caminda. E famianan na e momento ey a bira mas nervioso cu si algo por pasa na nan cas, sea un hende bira malo, candela of un otro emergencia, con ayudo lo por yega si henter e caminda ta blokia pa esnan cu a parkeer y cana bay alrededor di 100 meter di distancia pa acudi na e concierto.
Un bisiña a conta cu den mas di tres decada cu e ta biba den bario nunca a experencia algo asina. Nan a keda isola den nan cas, e zonido di e musica tambe a percura pa molester ya cu e casnan ta traha riba klip, e vibracion di zonido ta drenta den e suelo di klip y zona bao y den e casnan tambe. Tabatin bisiña cu no tabata na nan cas ora cu a aglomeracion di auto a cuminsa, pues ora cu nan a yega den nan bario alrededor di 10:00 pm, no por a yega y para dilanti di nan cas.
E habitantenan ta puntra nan mes, di tanto sitio cu tin pa organisa concierto y fiesta na Aruba, con por ta cu polis a duna permiso pa organisa un evento asina na un sitio y area cu no ta adecua.
E habitantenan aki ta biba riba un caya cu ya ta limita na direccion, tras di nan cas ta cura di aeropuerto tin y dilanti ta lama. E unico salida cu nan tin ta un caya di un direccion y esaki a keda blokia pa e candidad di autonan canto di caminda dilanti nan cas y hasta riba caminda.
Pa su mañan mainta a haya boter di bebida benta dilanti nan cas y den cura, a orina na cura di nan cas, masha vies mes. Bisñanan rabia a laga sa cu nan ta bay protesta contra e echo aki.
