Resientemente durante un bishita di trabou na Sürnam, mi tabatin diferente kombersashon ku tantu parlamentarionan komo dosentenan di Sürnam, tokante e sistema di edukashon di Kòrsou i tambe e skarsedat króniko di dosentenan.
Durante e bishita aki mi tabatin no ménos ku 100 kontakto telefóniko ku dosentenan di Sürnam ku lo ta interesá pa traha na Kòrsou. Dosentenan den diferente kampo i nivel di enseñansa. Di kual un gran parti a indiká ku nan a yega di solisitá na Kòrsou den pasado. Ta konosí ku dosentenan Sürnam a duna un aporte grandi na Kòrsou su sistema di edukashon. E echo ku dosentenan Sürnam ta dominá e idioma hulandes ta un bentaha. Ademas ku nan konosé nos historia i kultura. Mi ta maginá mi pa e dosente for di Sürnam sierto trayekto di entrenamentu adishonal lo ta nesesario i tambe kurso di Papiamentu.
Sürnam ta bastante avansá den e sektor di agrikultura i peska. Nan tin un estudio na nivel sekundario i universitario di Agrikultura. Lo ta benefisioso pa Kòrsou, eksplorá esaki komo posibel opshon pa estudio i podisé asta yega na palabrashonnan di finansiamentu di estudio pa studiantenan ku skohe e estudio aki. Mirando nos nesesidatnan den e sektor aki.
Frakshon di PAR a tuma nota di un komunikado di prensa, fechá 19 di febrüari 2019, kaminda Ministerio di Edukashon, Siensia, Kultura i Deporte a kuminsá reklutá dosentenan pa e aña eskolar 2019/2020, entre otro dosente nan yu di Kòrsou ku ta biba na Hulanda.
Den kuadro di esaki lo mi kier hasi sra. Minister Alcala Walle algun pregunta
pa loke ta trata e posibilidat pa skout dosentenan Sürnam pa traha den nos
sistema di edukashon:
- Minister Alcala Walle ta konsiente di e skarsedat di dosente riba diferente nivel den nos sistema di enseñansa? I ku tin un interes grandi bou di dosentenan Sürnam pa laborá na Kòrsou?
- Den e kuadro aki Minister Alcala Walle lo ta dispuesto pa tene un sondeo na Sürnam pa yena e vakaturanan habri, semper teniendo kuenta ku e trahadó lokal?
- Minister Alcala Walle lo por informá Parlamento di Kòrsou kua lo ta kriterionan pa dosentenan for di Sürnam por solisitá na Kòrsou? I kua ta e kriterionan pa nan por laborá komo dosente na Kòrsou?
