SMAC ta confirma cu ta berdad cu NO lo bay tin Carnaval na januari/februari 2021. Mirando e situacion actual di COVID-19 y cu Carnaval ta aglomeracion di hende y teniendo na cuenta e situacion financiero actual, no ta na su lugar pa organisa Carnaval na januari/februari 2021.
SMAC conhuntamente cu Gruponan Uni, Stichting Musica y Raad van Toezicht a tuma e decision aki. SMAC hunto cu Raad van Toezicht a sinta na mesa cu Minister di Finanzas, Economia y Cultura/Gobierno pa sinti kico nan posicion ta pa cu Carnaval 2021.
Gobierno tampoco ta mira Carnaval factibel na januari/februari 2021 y mester tene cuenta cu hopi factor entre otro esnan ya menciona aki riba. Na 2021 SMAC, Gruponan Uni y Stichting Musica lo organisa un asina yama “Carnival Warm Up Event” den e luna di juli. Dor di organisa algun actividad y paradanan ta yuda e gruponan di Carnaval pa crea un fondo chikito.
SMAC hunto cu Gruponan Uni y Stichting Musica a tuma e decision pa crea un concepto nobo pa cu nos prestigioso Carnaval 2022. E tres organisacion nan aki ta deliberando con pa crea e concepto nobo pa Carnaval sin ta serca di e temporada di Pasco, Dande, Aña Nobo y celebracion di Tres Rey. Hopi biaha ya ta cuminsa cu preparacion nan pa Carnaval caba den luna di november y december.
E pensamento ta bay pa hala Carnaval pa un temporada mas stabil manera juli, augustus of september. Halando Carnaval for di e temporada ariba menciona ta duna tur hende mas espacio pa celebra e dianan di fiesta den tur trankilidad, nos lo no ta mara mas na e fecha di Diaranson di Shinishi y ta duna mas tempo pa prepara pa nos Carnaval.
Di e manera aki pues Carnaval lo conoce un etapa nobo y un temporada nobo. Por menciona tambe cu un di e beneficionan di organisa carnaval na juli, augustus of september lo ta cu esaki ta cay p’afo di nos temporada di “high season turistico”, dunando e temporada nobo aki un boost positivo pa nos economia, cual nos isla mester mas di dje na e momento aki.
SMAC, Gruponan Uni y Stichting Musica ta invita pueblo di Aruba pa participa den e decision aki dor di manda bo ideanan pa nos via mail na: [email protected]. Asina cu nos tin mas informacion relaciona cu e temporada nobo di Carnaval na aña 2022, nos lo trece tur informacion pa tur esunnan pendiente di nos Dushi Carnaval.
