DVG ta adverti pa evita criadero di sangura pa no bin brote di dengue

Tur aña di nobo entre luna di juli pa december ta lunanan di yobida. Pa algun esaki ta un bendicion, pa salud publico esaki por ta un peliger. Yobida ta nifica posibilidad pa sangura broei y ocasiona brote di enfermedadnan manera Dengue, Chikungunya y Zika. Pa evita cu Aruba por enfrenta un brote di e enfermedadnan aki atrobe, ta importante pa comunidad completo pone atencion y elimina awa cu ta keda para despues di cada yobida.

Sangura mester awa pa por pone su webonan. Si cada persona percura pa rond di su cas no tin awa para, hunto nos por mantene e cantidad di sanguranan abou y asina reduci e cantidad di malesanan di Dengue, Chikungunya y Zika.

Pa mas informacion y conseho con pa mantene bo espacio liber di sangura. Tuma contacto cu GKMB na 5855533. Si bo persona ta sinti hopi molester di sangura, GKMB ta conseha pa haci un bon inspeccion rond di cas pa elimina tur awa para. Si despues di haci inspeccion ainda e molester ta continua, por yama GKMB pa informa y nos lo inspecciona e vecindario.