Sociedad Interamericano di Prensa (SIP) a condena e detencion di e reportero Mericano, Cody Weddle y di su asistente Carlos Camacho, na man di agentenan di contrainteligencia militar di Venezuela.
E organisacion a exigi su liberacion inmediato. Sindicato Nacional di Trahadonan di Prensa di Venezuela a revela riba Twitter cu a invadi e residencianan di Weddle y Camacho diahuebs mainta pa agentenan di e Direccion General di Contrainteligencia Militar (DGCIM). Ta desconoce e paradero di ambos for di 8’or di mainta cu nan a wordo deteni.
Presidente di SIP, Maria Elvira Dominguez y Roberto Kock, presidente di e Comision di Libertad di Prensa y Informacion, a demanda “garantianan pa e siguridad fisico di e dos trahadonan di prensa y nan liberacion inmediato.”
Weddoe, periodista independiente, ta biba na Caracas for di 2014 y ta colabora cu e canal na Ingles di Miami, WPLG Local 10 (canal 10), informando riba e crisis politico na Venezuela. Camacho, su ayudante, ta di nacionalidad Venezolano.
Dominguez, directora di e corant Colombiano El Pais y Rock, director di e website Mexicano di noticia La Silla Rota, a condena e aumento di represion contra prensa den e ultimo lunanan na Venezuela, unda cu segun e organisacion Espacio Publico, cu a detene brevemente mas of menos 49 reportero e aña aki y a deporta shete.
“Ta trata di un acto grave di censura di un regimen cu no ta respeta e libertadnan di expresion y di prensa y ta persigui, acosa y busca pa tacha informacion liber y independiente,” Dominguez y Rock a subraya, kendenan ta na e capital Mericano pa boga pa e libertad di expresion y democracia na Nicaragua. SIP ta un entidad sin fin di lucro dedica na e defensa promocion di e libertad di prensa y di expresion den Americas. E ta componi pa mas di 1300 publicacion di e hemisferio occidental; y tin sede na Miami, Florida, Merca.
