Minister Dangui Oduber: Aire den hospital no ta dañino

E investigacion di TNO riba e calidad di aire den Dr. Horacio E. Oduber Hospital ta indica cu no tin ningun substancia dañino den e area. Esaki ta loke Minister di Salubridad Publico, Dangui Oduber a indica. E rapport mes ainda no ta den man di Parlamento.

Desde e renobacion di Hospital, tabatin kehonan riba holo di diesel den e edificio. E molester di holo malo a haci cu tabatin protestanan bao di e empleadonan y hasta a haci cu no a continua cu operacionnan.

Minister Oduber a priminti na Staten cu ta investiga e calidad di aire den e hospital . A haci e investigacion aki via TNO Caribbean. “TNO a midi cu aparatonan special durante varios dia y varios ora di dia. Tambe a midi kico e efecto tabata di e gas di e boilernan riba e calidad di aire. Ta papia aki cu nunca e boiler mester tabata instala y en particular, un dieselboiler. E decision pa a instala un boiler di diesel hunto cu tur aparato tabata robes y awo ta trece hopi reto cun’e.”

Asina mes e rapport ta indica cu e calidad di aire den Hospital no ta dañino pa ningun hende, pues ni pa e personal, ni pa pashentnan y tampoco pa bishitantenan den hospital.