Henter Aruba tabata testigo con Parlamento y Gobierno a trata e presupuesto 2018 siman pasa. Den e dianan di tratamento bo por a sinti democracia bibo, asina Fraccion di MEP ta indica den un relato di prensa.
RECORD DI PREGUNTA Y MOCION
Parlamentarionan hopi critico a scrutina henter e presupuesto cu mas di 2000 pregunta, di cual 75% tabata di parlamentarionan di coalicion mes. Parlamentarionan a entrega 85 mocion, di cual 90% tabata di parlamentarionan di coalicion mes. Cu esaki e parlamentarionan di MEP POR y RED a demostra cu nan ta tuma nan trabou hopi na serio y cu nan no ta un stempelparlement.
Parlamentarionan a expresa cuanto daño gobierno anterior di AVP a causa nos comunidad y kier pa Gobierno pone prioridad na esakinan.
Antes talves e lider di partido mayoritario por a impone su deseo y corta hala di e parlamentarionan pero awor ta obvio cu ta otro temponan. Esakinan ta tempo cu henter comunidad ta mas critico, y ta spera esaki tambe di su parlamentarionan.
Esaki a cay den hopi bon tera den comunidad henter pasobra bo ta wak claramente un biento fresco y asina pueblo por ta mas trankil y sigur cu nan interesnan ta wordo defendi. Y princicpalmente cu no tin manipulacion mas.
DEBATENAN NA NIVEL
Un aspecto cu sigur a cay den bon tera ta e nivel di e debatenan. Tanto e mayoria di e Parlamentarionan como e mayoria di e Ministernan a hiba debatenan na nivel cu contenido sin mester rebaha nan mes na atakenan personal manera nos tabata custuma den ultimo 8 añanan. Durante Gobierno di AVP e debatenan tabata concentra nan mes mas riba mama y tata di oponente. Pero awor ta trata e temanam di gobernacion. Esaki ta un alivio y un aire fresco den Parlamento.
PROME MINISTER SINCERO Y INSPIRA
Esun cu talves a hala mas atencion tabata Prome Minister Evelyn Wever-Croes. Un señora bon prepara riba tur materia, cu un mensahe firme y positivo. El a trece e mensahe cla y raspa y a splica con e situacion ta. Mes momento el a demostra determinacion pa atende cu e problema y soluciona e problemanan cu nos pais ta enfrentando. El a indica cu prueba concreto con Gabinete Wever-Croes ta trahando pa gana confiansa bek, tanto den nos pais como internacionalmente. Y na final a inspira tur hende cu apesar cu ta temponan dificil, pronto lo tin miho temponan. El a inspira confiansa y a duna speransa.
Tur caminda na Aruba bo ta sinti e positivismo y e confiansa cu ta bolbiendo den Gobierno y den Parlamento. Nos no ta ainda caminda cu nos mester ta, pero nos ta riba hopi bon caminda!.
