E situacion laboral na Aruba Airport Authority NV (AAA) ta uno tenso, segun minister di Salubridad, Deporte y Turismo, Dangui Oduber, cu a haci cu e trahadonan a presenta na Bestuurskantoor pa asina entrega un manifiesto.
Durante di e rueda di prensa di gobierno, e mandatario a splica cu tin hopi trahado preocupa. Ta conoci cu COVID a causa hopi destruccion cerca hopi compania.
Hopi compania ta sinti e efectonan financiero. AAA NV tambe ta sinti e consecuencianan financiero causa pa COVID.
E aña aki AAA lo bay perde 100 miyon florin na entrada. Nan lo tin un perdida netto di 23 miyon, siendo cu conforme nan presupuesto cu nan a traha, nan lo mester tabata tin un ganashi di 28 miyon florin. Esaki a pone cu e compania a cuminsa cu un proceso di reorganisacion.
Gobierno, como accionista mayoritario a splica gerencia for di un principio cu e punto di salida di Gobierno como accionista, ta mantencion di cuponan di trabao.
A bisa cu esnan cu ta indica cu nan mes tin deseo di haya un pakete boluntario. A pone hopi enfasis riba e palabra boluntario, pasobra paketenan boluntario a keda ofreci durante e prome buelta.
Tin 27 empleado cu a duna di conoce cu nan ta acepta e pakete aki. Ora un hende mes indica cu e ta dispuesto pa acepta un pakete boluntario. No tin ningun problema cun’e. Loke si a bisa gerencia ta cu tin un problema ta e retiro mandatorio di empleadonan. A dirigi dos carta na gerencia di AAA.
A tene dos reunion di accionista pa expresa pensamento y opinion como accionista. Na momento cu a cuminsa cu e proceso aki, a splica den ki situacion AAA. Gobierno como accionista a bisa cu en bes di bay over na un retiro boluntario of mandatorio manera anuncia, a bisa que hubo considera un entrega di salario di tur empleado di 20%, conhuntamente cu arbeidstijdverkorting, gerencia a bisa cu sindicato no kier considera esaki.
Sindicato no kier acepta esaki. Despues cu Oduber a reuni cu ambos sindicato cu ta FTA y STA, ambos a duna di conoce cu nan no ta di acuerdo cu esey y ta prefera di negosha un pakete atractivo cu ta na beneficio di esnan cu lo tin interes pa acepta un paketa.
Pa Oduber como minister, ta haya hopi remarcabel y hopi straño cu un sindicato cu ta representa e trahadonan, cu ta suppose di percura pa tin mantencion di cupo di trabao na prome luga, enbes di pensa riba un pakete lucrativo, e prome tarea como sindicalista, ta percura pa ningun hende perde trabao.
Esey tabata e punto di salida di gobierno como accionista, pa ningun hende perde trabao. Pesey a purba di convence gerencia y sindicatonan, pa un salario inkorting di 20% pa evita cu ta bay over na retironan boluntario of mandatorio, manera cu a discuti.
A keda hopi asombra cu e sindicatonan no tabata di acuerdo cu un reduccion di salario pa garantisa cu tur hende ta mantene trabao.
